Bota
Një shefe e BAMF-it dyshohet për korrupsion: “U ka dhënë azilin” 2000 personave
Bëhet fjalë për një punonjëse me post drejtues e cila ka marrë vendim pozitiv për rreth 2000 raste azilkërkimi, pa bazë juridike
Pak ditë më parë mediet gjermane publikuan lajmin për implikimin e Zyrë Federale për Migrimin dhe Refugjatët (BAMF) në një aferë korrupsioni, por mungonin të dhëna më të detajuara. Ndërkaq Deutsche Welle sot shkruan se bëhet fjalë për një punonjëse me post drejtues e cila ka marrë vendim pozitiv për rreth 2000 raste azilkërkimi, pa bazë juridike.
Qeveria gjermane ka nisur hetime kundër një punonjëseje të Zyrës Federale për Migrimin dhe Refugjatët (BAMF). Ka hetime kundër personave të veçantë për shkak të një “dyshimi të konsiderueshëm”, tha zëdhënësi i qeverisë, Steffen Seibert në Berlin. Ministria Federale e Brendshme plotësoi se një nëpunëse civile e prekur është liruar nga detyrat e saj. Hollësi nuk u dhanë, për shkak të procedurës në vazhdim.
Bëhet fjalë kryesisht për azilkërkues jezidë
Sipas raporteve të medieve, punonjësja e BAMF-it e degës së Bremenit ka miratuar në më shumë se 2000 raste kërkesa për azil, megjithëse kjo nuk justifikohej nga parakushtet. Në rastin e azilkërkuesve thuhet se në pjesën më të madhe bëhet fjala për jezidë. Krahas nëpunëses së BAMF-it në hetimet e prokurorisë së Bremenit besohet se janë përfshirë tri avokatë dhe një përkthyes. Nëse janë paguar me të vërtetë para, kjo nuk është e qartë. Por të paktën nëpunësja civile besohet se ka marrë subvencione në formën e ftesave në restorante.
Më parë ishte fjala për 1200 raste. Ndërkohë thuhet se hetuesit flasin për rreth 2000 raste në vitet 2013 deri 2017. Vetëm 98 e kërkesave qenë në kompetencën e degës së Bremenit të BAMF-it. Azilkërkuesit thuhet se kryesisht nuk qenë nga Bremeni, por nga Saksonia e Poshtme dhe nga Rini Verior-Vestfalia.
BAMF ende nuk ka dalë me qëndrim
Hetuesit bënë të ditur se në ditët e kaluara kanë kontrolluar në këtë kuadër tetë objekte në Bremen dhe në Saksoninë e Poshtme, midis tyre shumë zyra kancelarore. Akuza është për rryshfet dhe nxitje për të paraqitur lutje të manipuluara për azil. Një zëdhënëse e BAMF-it tha se janë urdhëruar “verifikime të rregullave dhe të anulimeve”. Sekretari i brendshëm i shtetit Stephan Mayer i tha rrjetit redaksional Gjermania, se miratimet e kërkesave për azil të nxjerra në Bremen do të verifikohen sa më shpejt që të jetë e mundur dhe në rast nevoje do të anulohen. Kuota e pranimit të kërkesave për azil për jezidët nga Siria, në vitin 2016 në Gjermani ka qenë gjithsesi 92 deri 96 për qind.
E-Diaspora
-
Mërgimtari humb jetën në vendin e punës, në Maltë Bari Balla, është 51-vjeçari shqiptar, i cili humbi jetën në vendin e punës në Maltë. Shqiptari...
-
Kurti dhe Rozeta Hajdari vizituan Panairin e “Hannover Messe 2024”
-
Lea Ypi, “një yll i ri i fiksuar në qiellin filozofik”
-
Mërgimtari nga Suhareka vdes në një aksident tragjik në Itali
-
Koncert në Cyrih nga dy artiste shqiptare, Agona Shporta dhe Tringa Sadiku
Jeta në Zvicër
-
Sa aktivë janë spiunët kinezë në Zvicër? Këto ditë ka pasur disa arrestime në Gjermani për spiunazh të dyshuar për Kinën dhe një...
-
Aeroporti i Bazelit evakuohet për arsye sigurie
-
Gjykata Federale: I moshuari ka të drejtë për ndihma, edhe pse ka shpenzuar paratë e veta
-
Pse 1 maji nuk është festë publike kudo në Zvicër?
-
Zvicër: Dy trena janë bllokuar në tunelin midis dy stacioneve