CH-Ballkani

Prokurorët e interesuar për t’i mbrojtur gazetarët nga kërcënimet

Gjithashtu janë caktuar shtatë prokurorë në shtatë prokuroritë e Kosovës për t’u marrë me rastet e gazetarëve dhe kërcënimeve ndaj tyre

Për herë të parë është mbajtur tryeza “Tryezë pune lidhur me rastet e kërcënimeve ndaj gazetareve”, në Prishtinë, organizuar nga Zyra e Prokurorit të Shtetit dhe Asociacioni i Gazetarëve të Kosovës, raporton albinfo.ch.

Në këtë tryezë kanë marrë pjesë përfaqësues nga Prokuroria e Shtetit, prokurorë nga prokuroritë e Kosovës, Policia e Kosovës, Asociacioni i Gazetarëve të Kosovës, Këshilli i Mediave të Shkruara të Kosovës, shoqëria civile, gazetarë dhe përfaqësues nga organizatat ndërkombëtare.

Kjo tryezë është mbajtur për herë të parë, duke vënë në pah kërcënimet që i marrin gazetarët në Kosovë.

Është thënë se që nga paslufta deri më tani janë regjistruar 130 raste të kërcënimeve ndaj gazetarëve, prej tyre më së shumti në Prishtinë, gjithsej 90.

Besim Kelmendi, prokuror në zyrën e kryeprokurorit të Shtetit është caktuar si koordinator për rastet e kanosjeve apo veprave tjera penale që kryhen ndaj gazetarëve në lidhje me punën e tyre si gazetarë.

Gjithashtu janë caktuar shtatë prokurorë në shtatë prokuroritë e Kosovës për t’u marrë me rastet e gazetarëve dhe kërcënimeve ndaj tyre. Prokuroria e Shtetit është e interesuar që t’i mbrojë gazetarët kur ata kërcënohen dhe të jetë në shërbim të tyre, që të kryejnë punën e tyre pa presion dhe pa problem.