Lajme

Protestuesit natën e kaluan në tenda, sot vazhduan protestën

Protestuesit e PD-së po kërkojnë rënien e Qeverisë Rama edhe mbajtjen e zgjedhjeve të lira, pasi që siç pretendon PD, qeverisja aktuale është duke ia mbytur perspektivën Shqipërisë

Qindra simpatizant të Partisë Demokratike të Shqipërisë, e kanë kaluar natën tenda, për të vazhduar protestën e djeshme kundër Qeverisë së Edi Ramës. Protestuesit po kërkojnë rënien e kësaj qeveri edhe mbajtjen e zgjedhjeve të lira, pasi që siç pretendon PD, qeverisja aktuale është duke ia mbytur perspektivën Shqipërisë.

Mes protestuesve, ka qëndruar edhe bashkëshortja e Lulzim Bashës liderit opozitar, bashkë me deputetët e kësaj force politike. Ndërsa vëmendje tërhoqi dhe prania e kampionit të mundjes, Elis Guri. Ndërsa vetë Basha ka qëndruar deri në mëngjes duke i takuar një nga një protestuesit në tenda.

“Kur ndodhesh para një force dhe energjie të tillë, pak rëndësi ka sa mirë apo sa dobët e ke planifikuar. Realisht masat nga shtabi i protestës ishin marrë, por ajo që i ka dhënë energji dhe zemër protestës janë vet njerëzit”, është shprehur Basha, sipas të cilit, protesta do të vazhdojë “derisa t’i jepet fund asaj që e quajti “demokraci fasadë”.

“Kemi një demokraci fasadë, ku shkelen përditë të drejtat e qytetarëve; kemi parlament fasadë, që nuk përfaqëson as socialistë e as demokratë; kemi shëndetësi fasadë; bujqësi fasadë; ekonomi fasadë…”, tha Basha, sipas të cilit, “karvani që ecën përpara e nuk dëgjon qentë që lehin e ka çuar Shqipërinë në greminë”.

Ndryshe, një ditë më parë, qindra mijëra mbështetës të PD-së protestuan duke kërkuar zgjedhje të lira.

“Sot marrim vendimin për të ndalur njëherë e mirë maskaradën e grabitjes së zgjedhjeve. Ose do të bëjmë zgjedhje të lira, ose zgjedhje nuk do të ketë! Rrugë të mesme nuk ka! Rrugë tjetër nuk ka! Zgjedhje për fasadë, zgjedhje të njollosura, nuk do t’i pranojmë. Zgjedhje të standardeve të krimit nuk do t’i pranojmë. Zgjedhje me kriminelë të veshur me pushtet nuk do t’i pranojmë”, tha Basha.

Kreu i demokratëve shtoi se kjo qeveri e ka çuar vendin në mjerim, varfëri dhe kaos dhe “tani që u ka vjedhur gjithçka nga xhepat dhe shtëpitë tuaja, do t’u vjedhë edhe zgjedhjet”.