Gruaja

Ish refugjatja që menaxhon miliarda euro në Austri

Kaltrina Durmishi është shembulli më i mirë i integrimit të shqiptarëve në Austri. Ajo kishte shkuar si refugjate në Austri ndërsa sot nëpër duart e saj kalojnë fonde miliarda euro të bankës Raiffeisen "Albinfo.ch"e vizitoi atë në zyren e saj për t'u njohur për se afërmi me punën dhe arritjet e vajzës që bën krenarë gjithë shqiptarët

Për Kaltrina Durmishin kisha dëgjuar edhe para se të vija në Vjenë të Austrisë. E kisha parë shpesh në televizion teksa përkthente për liderët politikë shqiptarë gjatë vizitave të tyre në Austri si dhe teksa moderonte manifestime dhe aktivitete kulturore shqiptare në Austri. Sapo erdha në Vjenë, përmes disa miqsh kërkova të njihem me të. Më thanë se punon në Raifeissen Bank. E sigurova kontaktin. Biseduam dhe më tregoi adresën ku punon. Shkova në filialin e bankës me mendimin se do ta takoj duke punuar si nëpunëse në njërin nga sportelet e bankës, por jo! Kur hyra brenda, mu desh të paraqitem në recepcion. U  prezantova dhe iu thash se kam lënë takim më Kaltrina Durmishin. Më thanë se duhet të pres pasi që është brenda me një delegacion të huaj. Pasi prita pak minuta, Kaltrina zbriti nga kati i 5-stë i zyrës së saj. Një vajzë elegante, e thjeshtë dhe me një të folur rrjedhshëm të gjuhës shqipe thuajse ka magjistruar në Kosovë e jo në Vjenë të Austrisë. Na kërkoi falje për pritjen, ndërkohë na ftoi edhe për një kafe  “ E kisha në takim një delegacion rus, për investime të disa fondeve që kapin shifra miliona euro”, tregon ajo për “albinfo.ch” copëza bisede nga ai takim.

Por për Kaltrinën kjo është vetëm një ditë e rëndomtë ngase ajo çdo ditë ka takime me palë nga shtete të ndryshme të botës. “ Ne merremi me implementimin e ligjit në investime të fondeve. Përgjegjësia ime është që për afër 20 miliard euro fonde të cilat i menaxhon Raiffeisen Bank, të mbahen gjitha ligjet, rregullat dhe limitet e ligjeve të Austrisë dhe Evropës. Mbaj përgjegjësinë për të gjitha asetet e fondeve që çdo ditë të janë të vlerësuara në bazë të standardeve botërore dhe çdo humbje apo fitim është nën kontrollin tim”, shprehet vajza nga Skenderaj.

Shifrat e parave për mua janë vetëm llogari matematikore
Por si arrin t’ i menaxhojë kur sheh gjithë ato shuma duke kaluar nëpër duar të saj?
 “ Me fonde të tilla sigurisht se nuk jam vetëm unë, ka edhe shumë e shumë të tjerë që e bëjnë këtë punë. Por gjithçka është shumë automatike dhe kërkon koncentrim dhe kujdes të madh. Shifrat e mëdha të parave nuk na lënë aspak përshtypje, për mua janë veç numra dhe llogari matematikore. Asnjëherë nuk i mendoj si shuma të parave”, përgjigjet ajo.
Kaltrina me familjen e saj janë larguar nga Kosova në vitin 1998 kur ajo ishte në klasën e tretë të shkollës fillore. Bashkë me prindërit dhe motrat kishin bërë rrugë të mundimshme derisa kanë arritur në Austri. Për një kohë të gjatë ishin strehuar në Hungari ndërkohë lajmi më i kobshëm për ta ishte kur kanë kuptuar se në atë kohe është vrarë axha i saj, Fekë Durmishi. Më pas ata kalojnë në Austri, ku u lind edhe motra tjetër e Kaltrinës. Kështu vendosën të jetonin përkohësisht, por që sot e asaj dite nuk u larguan nga ky shtet, madje tashmë ajo dhe familja janë të gjithë të pajisura me pasaporta austriake.

Që në fillim, Kaltrina u integrua shumë mirë në shkollë dhe shoqëri austriake duke e mësuar shumë shpejt gjuhën gjermane e sidomos në matematikë dhe për vetëm gjashtë muaj, arrin rezultatet më të mira në klasë. Kjo ia mundësoi që edhe të regjistrohet në Gjimnaz e më pas të studiojë njëkohësisht fakultetin ekonomik dhe shkencat politike. Në këtë të fundit edhe ka magjistruar. “Me prindërit e mi asnjëherë nuk kemi diskutuar se a duhet të studioj, por vetëm kemi biseduar çka do të studioj. Ata janë mbështetësit e mi për gjithçka në jetë. Ata më kanë mësuar që gjithmonë të jem këmbëngulëse dhe asnjëherë mos të dorëzohem deri në arritjen e suksesit”, shpreh falënderimin ajo.
Shembull i integrimit
Kaltrina është shembull i integrimit të shqiptarëve në Austri. Thotë se asnjëherë nuk është ndier “e huaj” në Austri. “Unë asnjëherë nuk e kam mohuar përkatësinë time kombëtare dhe kurrë nuk jam ndier e diskriminuar. Mendoj se shqiptarët shpesh herë vet distancohen dhe nuk ndjehen të barabartë me njerëzit tjerë në Austri. Kur ne ndihemi të barabartë, kur të rinjtë tanë kanë përgatitje shkollore dhe profesionale, atëherë askush nuk mund të na diskriminojë”, potencon Durmishi për “albinfo.ch”.
Prej 11 vitesh Kaltrina është moderatore e aktiviteteve kulturore të Shoqërisë Kulturore Artistike “17 Shkurti” që udhëhiqet nga Tahir Turkaj në Vjenë. “Është një kontribut shumë  modest që mundohem ta bëj për vendin tim”, ndërkohë shton se kohën e lirë ia kushton aktiviteteve humane sidomos duke iu dalë në ndihmë fëmijëve të sëmurë. “E kam trashëgimi nga axha i ndjerë, axha Fekë”.
E derisa bisedonim edhe për situatën politike në Kosovë, Kaltrina thotë se se deri më tash ka pasur disa oferta për të punuar në Kosovë por që sipas saj nuk kanë qenë serioze. “Kisha pranuar ndonjë ofertë e cila do të ishte vërtet serioze, jo politike, por që ka për qëllim të mirën e përgjithshme. Asnjëherë nuk do të pranoja ofertë e cila duhet nënshtruar ndonjë programi politik”, thotë prerazi.
Megjithatë edhe pse e rritur në Austri, Kaltrina sa herë që të ka mundësi dhe për çdo pushim viziton Kosovën.  “Atje kemi familjarët tanë, kemi shtëpinë tonë, është gjysma e zemrës…”.
Dasmën në Kosovë
 Por ky pushim për Kaltrinën do të jetë edhe më i veçantë, ndoshta edhe më i bukuri në jetën e saj. “Natyrisht se është i veçantë jo vetëm për mua por edhe për familjen time. Në gusht do ta festoj dasmën time në Kosovë. Meqë i fejuari im është nga Gjakova kemi rezervuar një restorant afër Prizrenit dhe do ta bëjmë një dasmë të madhe të kombinuar Drenicë / Gjakovë. Dasma do të jetë sipas elementeve që na kanë pëlqyer mua dhe të fejuarit tim. Kemi marr gjërat që na kanë palyer nga tradita dhe do të i kombinojmë më ato moderne”.
Në fund të bisedës Kaltrina na tha se këto ditë është duke i shijuar me familjen e saj, me motrat dhe vëllain e vetëm, ndërsa në qëllimet e saja janë që të vazhdoj akoma me shkollim të mëtutjeshëm duke kërkuar gjithmonë lartësitë e sukseseve!