Bota

Rritet numri i ndalimit të emigrantëve në SHBA

143,470 persona janë arrestuar, një rritje prej 25 për qind, nga 114,434 vetë që ishte një vit më parë, sipas të dhënave për vitin fiskal 2017, që përfundoi më 30 shtator

Qeveria amerikane po ndalon një numër më të madh emigrantësh që ndodhen në Shtetet e Bashkuara, nën administratën e presidentit Donald Trump, ndërsa numri i të deportuarve është më i vogël, njoftuan zyrtarë federalë të imigracionit.

143,470 persona janë arrestuar, një rritje prej 25 për qind, nga 114,434 vetë që ishte një vit më parë, sipas të dhënave për vitin fiskal 2017, që përfundoi më 30 shtator, raporton ‘Zëri i Amerikës’.

Numri i personave të deportuar është gjithsej 226,119, një rënie prej 6 për qind, krahasuar me një vit më parë, përcjell albinfo.ch.

Por, të dhënat për vitin 2017, po ashtu tregojnë se agjentët federalë kryen 25 për qind arrestime më pak në kufi, duke rënë në shifrën 310,531, më e ulëta në 45 vitet e fundit.

Pakësimi i numrit të arrestimeve në kufi, mund të jetë edhe arsyeja e pakësimit të numrit të deportuarve, ngaqë Agjencia e Imigracionit dhe e Doganave merr kujdestarinë e njerëzve të ndaluar në kufi nga Agjencia e Doganave dhe e Mbrojtës së Kufijve, para se t’i deportojë ata.