Autotech

Sa telefona janë shitur në vitin 2017

„International Data Corporation“ (IDC) dhe „Strategy Analytics“ raportuan për shpërndarjen globale të telefonave gjatë tremujorit të katërt, si dhe gjatë tërë vitit 2017, shkruan albinfo.ch.

Të dhënat tregojnë se “Apple” ka dërguar 77.3 milionë modele iPhone në tremujorin e katërt të vitit të kaluar, më shumë se çdo prodhues tjetër. Kur është fjala për tërë vitin, “Samsung” ka ruajtur pozitën udhëheqëse, duke ofruar më shumë se 317 milionë telefona.

“Xiaomi”, kompania kineze, e cila i ka impresionuar analistët, gati ka dyfishuar dërgesën e saj, 28.1 milionë njësi në mes të tetorit dhe dhjetorit 2017, kundrejt 14.3 milionë njësi në të njëjtën periudhë të vitit 2016.

Sezoni i kaluar festiv ishte pothuajse i pasuksesshëm për prodhuesit e telefonave, ku katër nga pesë prodhues të industrisë patën rënie në furnizime. Sipas analizës, kjo periudhë pësoi rënien më të madhe vjetore në historinë e smartfonëve, nga 438 milionë pajisje në tremujorin e katërt të vitit 2016 deri në 400 milionë të vitit të kaluar.

Sipas të dy kompanive analitike, çdo i pesti telefon gjatë vitit 2017 ishte i modelit “Samsung”. “Apple” mbeti në vendin e dytë, me një pjesë të tregu prej 14.7%, e ndjekur nga “Huawei” dhe “Oppo”.

Megjithëse të dhënat nga IDC dhe „Strategy Analytics“ janë paksa të ndryshme, të dy raportojnë se shpërndarja e telefonave gjatë 12 muajve të kaluar ishte rreth 1.5 miliardë pajisje. Kjo është pothuajse e njëjtë si gjatë vitit 2016.