Bota

Shifra rekorde të CO2 në vitin 2016

Sipas njoftimit të Organizatës Botërore Meteorologjike, vitin e shkuar pati rritje prej 50 për qind në krahasim me mesataren e dhjetë vjetëve të fundit

Përqendrimi i dyoksidit të karbonit (CO2) në atmosferën e Tokës ka pasur shifra rekorde në vitin 2016.

Sipas njoftimit të Organizatës Botërore Meteorologjike, vitin e shkuar pati rritje prej 50 për qind në krahasim me mesataren e dhjetë vjetëve të fundit.

Hulumtuesit kanë thënë se një gjë e tillë është për shkak të aktivitetit njerëzor dhe fenomenit të motit të quajtur “El Nino”, që ka ngritur CO2 në një nivel që s’është parë në 800 mijë vjet. “El Nino” është fenomen i motit që shkaktohet kur uji i nxehtë i Oqeanit Pacifik nga perëndimi rrjedh drejt lindjes.

Shkencëtarët thonë se kjo rrezikon temperatura të padurueshme.

Të dhënat për këtë hulumtim janë bazuar në matjet në 51 shtete.

“Është rritja më e madhe që kemi parë në 30 vjet. Rritja e fundit që kemi pasur ishte në efektin ‘El Nino’ të vitit 1997-98, atëkohë ishte rritur për 2.7ppm, ndërsa tani 3.3ppm. Kjo është rritje 50 për qind në krahasim me mesataren e dhjetë vjetëve të fundit”, ka deklaruar Oksana Tarasova nga WMO për BBC, transmeton Albinfo.ch.