Kremten e Flamurit Shqiptar, e nderojnë edhe personalitete zvicerane

Thierry Apotheleoz kryetar i Bashkisë së Vernier, të Gjenevës, duke marrë fjalën ka thënë se ndjehet është ndjerë i nderuar që ka qenë në mesin e komunitetit shqiptar

Komuniteti Shqiptar i Gjenevës, i përkrahur nga Ministria e Diasporës së Republikës së Kosovës dhe në bashkëveprim me shoqatat dhe klubet tjera të këtij kantoni ka  organizuar përvjetorin e 102  të  Pavarësisë së shtetit shqiptar. Kjo kremte  që ndër shqiptarë njihet edhe si dita e Flamurit  Kombëtar ka përbashkuar pa dallim feje e ideologjie të gjithë mërgimtarët e Gjenevës dhe të qyteteve të Francës që shtrihen përreth këtij regjioni.

Ky manifestim  i një rëndësie të veçantë si rëndom ka filluar me intonimin e himnit nacional. Pastaj fjala i është dhënë Thierry Apotheleoz kryetar i Bashkisë së Vernier, të Gjenevës, i cili është ndjerë i nderuar që ka qenë në mesin e komunitetit shqiptar .

Ai fillimisht ka potencuar që ka krijuar përvoja pozitive me këtë komunitet të cilin e konsideron si njërin ndër komunitetet me të vyeshme dhe më të integruara në Kantonin e Gjenevës dhe më gjerë.

Po ashtu tubimin e ka përshëndetur edhe Guillaume Barazzone këshilltar administrativ i qytetit të Gjenevës, i  cili gjithashtu ka thënë se pjesëmarrja në një manifestim si ky për të është diçka e veçantë dhe do t’i mbetet gjatë në kujtesë. Njëkohësisht ai ka porositur që pavarësisht natyralizimit  të shqiptarëve këto vlera të mirëfillta  trashëgimi nga vendi i origjinës duhet të ruhen dhe duhet të përcillen ndër breza. Barazzone theksoi që shumëllojshmëria e kulturave është një pasuri që e bën  Gjenevën të veçantë nga qytetet tjera.

Mirënjohja shqiptare për Zvicrën

Pastaj në emër të Ministrisë së Diasporës ka përshëndetur Prof.dr. Muhamet Shatri. Duke iu drejtuar të pranishmëve ai tha: “Ju jeni djemtë dhe vajzat tona që gjithë andej  po tregoheni të denjë duke krijuar  vlera dhe duke mos harruar për as një moment trojet shqiptare dhe gjakun tuaj puro shqiptar”.

Ndërkaq Ambasadori i Republikës së Kosovës në Bernë, Naim  Malaj diskutimin e tij e përqendroi në mirënjohjen drejtuar shtetit të Zvicrës, i cili në ditët më kritike u ka dalë në ndihmë shqiptarëve duke ndarë gjithçka me ta. Me theks të veçantë Z. Malaj përshëndeti angazhimin maksimal të autoriteteve të këtij vendi të cilat janë ndër të parat që njohën Pavarësinë e Kosovës dhe që  vlerësuan që Kosova meriton mëvetësi dhe njohje ndërkombëtare nga të gjitha vendet e botës.

Në fund të fjalës së tij Ambasadori Malaj tha: ”Miqësinë shqiptare-zvicerane po e bëjnë të  përjetshme edhe futbollistët shqiptaro-zviceranë si: Shaqiri, Xhaka, Xhemaili, Mehmed, Behrami dhe Kasami të cilët po shkëlqejnë në kombëtaren e Zvicrës”.

Shqipëria dhe Kosova, drejt BE-së

Këtë tubim e ka përshëndetur edhe Oliverta Radoni përfaqësuese e Ambasadës së Shqipërisë  në Zvicër. ”Pavarësisht vendndodhjes së shqiptarëve kjo ditë është një ditë e bekuar për të gjithë, sepse  shënon themelet e shtetit shqiptar, i cili shtet u krijua me shumë sakrificë e gjak”, ka thënë Radoni. Mandej ajo vazhdoi duke thënë që Shqipëria si shtet Amë  i të gjithë shqiptarëve u rrit dhe u fuqizua edhe me krijimin e shtetit të ri të Kosovës. Këto dy vende së bashku po ecin me vendosmëri drejt integrimeve evropiane. Këtë më së miri e dëshmon edhe nata e sotme ku së bashku me ne janë edhe miqtë tanë zviceranë”.  

Më vonë në podium është shfaqur edhe Kryetari  i Komunitetit Shqiptar të Gjenevës, Ali .Sh. Mehmeti, i cili në emër të këtij Komuniteti  u ka  ndarë mirënjohje   studentëve shqiptarë të  porsa diplomuar në fakultetet e ndryshme të Universitetit me famë të Gjenevës. 

Në këtë manifestim kanë marrë pjesë edhe Dr. Rifat Haxhijaj, i cili në mars të këtij viti  mbrojti disertacionin e doktoratës nga fusha e sociologjisë në Universitetin e Gjenevës dhe Dr. Kushtrim Reka, i cili po në  këtë Universitet muajin e kaluar u doktorua në lëmin e shkencave të ekonomisë. Z. Reka aktualisht është ligjërues në Fakultetin e Menaxhmentit dhe të Ekonomisë në Gjenevë.

Ndërsa u vlerësua se lista me pesëmbëdhjetë emrat e të diplomuarve brenda këtij viti në shkallën Master të Universitetit të Gjenevës, s’  është vetëm sukses individual por është mburrje dhe  arritje kolektive e të gjithë shqiptarëve.

Pas shpërndarjes së  mirënjohjeve në skenë është prezantuar Ansambli i këngëve dhe i valleve “GEZUAR” nga Gjeneva. Ky Ansambël  tashmë me traditë nën përkujdesjen e koreografit të mirënjohur Xhemaili Berisha dhe të producentit Nexhmedin Ilazi, ka luajtur disa valle të bukura të trevave  tona.

Edhe të rinj zviceranë në kremte

Të rinjtë  e të rejat e këtij ansambli, me paraqitjen e tyre kudo po krijojnë atmosferë festive. Edhe pse të lindur e të arsimuar në Zvicër, ata, me lojën e tyre të mrekullueshme  po  argëtojnë dhe po  kënaqin jo vetëm shqiptarët por edhe vendorët. Profilizimin dhe mjeshtrinë në të vallëzuar  ditë më parë ky grup e ka dëshmuar edhe në Prishtinë, duke marrë pjesë  në shënimin e pesëdhjetë vjetorit të  Ansamblit shtetëror  të këngëve dhe të valleve“SHOTA” të Republikës së Kosovës.  Në festimin e ditës së Flamurit po ashtu mbresëlënëse me vallëzimet  e tyre   u treguan edhe grupet tjera muzikore nga Aarau, Berna, Lozana dhe St. Julien i Francës.

Ato, nga repertori i tyre i pasur interpretuan këngë kushtuar figurave më të ndritura të popullit shqiptar,duke filluar nga periudha e Skënderbeut e deri te heroi emblemë i ditëve tona Adem Jashari. Pikë tjetër e ndritshme e këtij programi ishin dhe recitimet me plot sharm e përsosmëri të nxënësve të mësimit plotësues nga shkolla shqipe e Bern¨s dhe ajo e Gjenevës.

Ata me gjuhën e tyre të pastër deklamuan pjesë të shkëputura nga krijimtaria e rilindëseve tanë. Në anën tjetër sikur herëve tjera edhe kësaj radhe, Afërdita Krasniqi me zërin e saj të çiltër para auditorit solli Homerin shqiptar At –Gjergj Fishta, duke prezantuar nëpërmjet recitimeve opusin e tij krijues, për çfarë nga publiku mori  duartrokitje të gjata. Njëkohshëm Zonja Krasniqi  e  udhëhoqi  edhe programin e këtij manifestimi festiv.

Fare në fund grupi i të rinjve  “Rinia Kontakt” nga Gjeneva i dëfreu deri në orët e vona të natës kryesisht të rinjtë .

Vlen të theksohet që në këtë natë të hareshme së bashku me shqiptarët festuan edhe shumë të rinj  e të  reja të komuniteteve tjera të Gjenevës. Këtë festë e përshkoi organizimi i mirë që e pati si  ndihmesë edhe përkrahjen materiale të dhënë nga Agjencia e fluturimeve “KOSOVAFLY” në Gjenevë  me pronar Memetali  Arifi.

Arif Ejupi

---