E-Diaspora

Martohet Arnold Gjergjaj

Dasma është zhvilluar të enjten, afër Gjakovës. Ajo ishte një ceremoni private, me familjarë dhe miq të afërt të boksierit dhe sipas traditave shqiptare

Arnold Gjergjaj, boksieri i njohur profesionist shqiptar nga Bazeli ka korrur fitoren e radhës. Ai është martuar me shqiptaren nga Kosova, Marten, ndërsa dasma është bërë në një restorant afër Gjakovës, vendit të tij të lindjes.

Dasma është zhvilluar të enjten. Ajo ishte një ceremoni private, me familjarë dhe miq të afërt të boksierit dhe sipas traditave shqiptare, shkruan gazetaPlus.net.

Në mesin e të ftuarve ishin edhe disa nga bashkëpunëtoret e “terminatorit shqiptar”, si dhe trajneri i tij Angelo Gallina.

Po ashtu në dasmë ishte edhe një ekip i televizionit publik zviceran SRF, i cili xhiroi disa pjesë të saj, që do të bëhen pjesë e një filmi dokumentar kushtuar jetës dhe karrierës së Arnoldit.

Gjergjaj shumë pak ka folur dhe bërë publike jetën e tij personale, megjithatë ai kurrë nuk ka harruar të tregojë se është shqiptar dhe se ndihet krenar për popullin dhe vendin e tij, ndërsa bashkëshorten e tij, të tashme, Martën, ai e ka prezantuar disa javë më parë përmes një postimi në profilin tij në facebook.

Arnold “The Cobra” Gjergjaj deri më tani ka zhvilluar 25 meçe të boksit profesionist, të gjitha i ka fituar (19 me nokaut), dhe nuk njeh asnjë humbje. Para tij paraqiten sfida edhe më të mëdha.