Bota

Sulmuesi me sëpatë kishte histori të sëmundjes mendore

Vëllai i tij ka treguar se ai kishte blerë sëpatën disa javë më parë, ndërsa kur e kishte kuptuar se vëllai i tij nuk ndodhej në shtëpi kishte telefonuar policinë, por ishte e kot

Mediat e shumta ndërkombëtare kanë shkruar për sulmin që ndodhi në Dyseldorf të Gjermanisë, ku një person sulmoi me sëpatë dhe plagosi nëntë persona, prej tyre katër rëndë, por sipas policisë gjermane janë jashtë rrezikut për jetë, raporton albinfo.ch.

Më pas u mësua se sulmuesi me sëpatë ishte Fatmir H., nga Kosova dhe kishte probleme me skizofreni. ‘Thelocal.de’, shkruan se ai kishte sulmuar personat e ndryshëm duke u munduar t’i jep fund jetës së tij. Ai u lëndua, derisa ende nuk ka dhënë deklaratë zyrtare për policinë për atë se çfarë ndodhi.

Policia gjermane ka bërë të ditur se për këtë rast nuk ka të dyshuar tjerë dhe është përjashtuar sulmi për motive terroriste. Ai kishte shpresuar se do ta qëllonte policia, gjë që nuk ndodhi.

Policia e kishte ndjekur atë, derisa kërceu nga urë, duke u lënduar. Ai pësoi shumë lëndime dhe u dërgua në spital.

Vëllai i tij ka treguar se ai kishte blerë sëpatën disa javë më parë, ndërsa kur e kishte kuptuar se vëllai i tij nuk ndodhej në shtëpi kishte telefonuar policinë, por ishte e kot.

Në mesin e viktimave ishte edhe një vajzë 13-vjeçare. Peronat të cilët ndodhen në stacionin e trenit kishin mbetur të shokuar nga ngjarja. 36-vjeçari nga Kosova kishte dalë nga treni dhe qëllonte me sëpatë pa kontroll. Ishte e pamundur që të ndalej.

Ai kishte tentuar të hyjë sërish në tren, por i kishin mbyllur dyert. Autoritet gjermane kanë shtuar masat e kontrollit. Ata kanë thënë se janë rreth 10 mijë radikalë islamistë në vend, kurse sulmet e personave që nuk kanë qëndrueshme psikologjike kanë ndodhur edhe më parë.