CH-Ballkani

Vetëm 5 % të shqiptarëve fituan azil më 2017

Në mesin e 20 shteteve kryesore të aplikantëve për azil, në të cilat vendimet u morën në shkallën e parë në vitin 2017, normat e njohjes në BE shkonin nga rreth 5% për qytetarët e shqiptarë në 94% për Sirinë dhe 92% për Eritrean

Në vitin 2017, mbi 22 mijë shqiptarë kërkuan azil për herë të parë në një nga shtetet e BE-së, duke u renditur të shtatët pas azilkërkuesve që iu largohen konflikteve dhe luftës. Por, sipas të dhënave të Bashkimit Evropian, vetëm 5% e vendimeve mbi këto aplikime kanë qenë pozitive.

Shanset që azilkërkuesve shqiptarë t’iu sigurohet mbrojtja në një nga vendet anëtare janë të ulëta, duke qenë se Shqipëria është një vend që synon të integrohet në Bashkimin Evropian dhe nuk është i përfshirë nga konfliktet, shkruan ‘Monitor’.

Në mesin e 20 shteteve kryesore të aplikantëve për azil, në të cilat vendimet u morën në shkallën e parë në vitin 2017, normat e njohjes në BE shkonin nga rreth 5% për qytetarët e shqiptarë në 94% për Sirinë dhe 92% për Eritrean, përcjell albinfo.ch.

28 vendet anëtare të Bashkimit Evropian siguruan mbrojtje për 538 mijë azilkërkues në 2017-n, me një rënie prej 25% krahasuar me 2016-n. Gjithashtu vendet anëtare pranuan rreth 24 mijë refugjatë të shpërngulur nga vendet e tjera.

Grupi që përfitoi mbështetje më të madhe nga BE-ja në 2017-n mbeten sirianët (175.8 mijë persona apo 33% e numrit total të personave që iu sigurua mbrojtje, të dytët ishin afganët me rreth 100.7 mijë refugjatë apo 19% e totalit dhe irakianët me 64 mijë apo 12% e totalit.