Animatore

Hava Krasniqi

Animatore

Hava Krasniqi, animatore shqiptare në Adliswil të Zvicrës po bën përpjekje që të frymëzojë dhe motivojë fëmijët shqiptarë që të mësojnë gjuhën shqipe.

Ideja e animatores shqiptare po bëhet e mundur me mbështetjen që ka gjetur nga Instituti Zviceran për Media Rinore SIKJM.

Fëmijët që do t’i përgjigjen këtij projekti do të mësojnë gjuhën shqipe nëpërmjet animacioneve dhe lojërave të ndryshme.

“Qëllimi është që duke folur e lexuar me fëmijët në gjuhën amtare, u mundësohet atyre një bazë e sigurtë për mësimin e gjuhëve të tjera por edhe për zhvillimin e inteligjencës së tyre”, thotë Hava Krasniqi, realizatore e këtij projekti.

Fëmijët po ashtu do të bëjnë edhe punë dore dhe gjithashtu do të dëgjojnë përralla, tregime, fabula, gjëegjëza, dhe do të mësojnë vjersha në gjuhën shqipe.

“Ky projekt nuk zhvillohet vetëm me fëmijët shqiptarë por edhe me fëmijët zviceranë, e me të gjithë fëmijët tjerë që jetojnë në Zvicër, por natyrisht punojmë me grupe të ndara”, tha për Albinfo.ch Hava Krasniqi, e cila punon edhe në Këshillimore të Nënave si ndërmjetësuese kulturore.

Shkollimin si animatore, ajo e kishte ndjekur në Basel, po ashtu me mbështetjen e Instituti Zviceran për Media SIKJM dhe Këshillimores së Nënave, dhe të disa bibliotekave dhe komunat ku zhvillojmë animacionet.

Tashmë cikli i parë me fëmijët ka filluar dhe do të zgjasë deri në muajin prill të këtij viti. Vazhdimi varet nga interesimi i treguar i fëmijëve.

“Mosha e dëshiruar e fëmijëve është 2 deri 5-vjeçare. Është projekt interesant dhe shumë i dobishëm për fëmijët”, tha animatorja Krsaniqi.

Megjithatë, ajo është shprehur skeptike se interesimi i fëmijëve do të jetë i kënaqshëm duke u bazuar në të dhënat e LAPSH-it se pak nxënës vijojnë mësimin në gjuhën shqipe.

“E di nga përvoja ime e punës sime- pranë Këshillimores për Prindër (Mütterberatung-AJB) se kjo e fundit ndihmon prindërit falas në shumë aspekte, por prindërit shqiptarë hezitojnë të komunikojnë me këshillimoret”, thekson zonja Krasniqi.

Ajo i arsyeton prindërit me angazhimin e madh që e bëjnë për të ndihmuar në të njëjtën kohë edhe familjet e tyre në vendlindje.

“Ndoshta prindërit shqiptarë po punojnë shumë, ndryshe nuk mundëtë ndihmojmë vendlidjen, dhe nuk u mbetet kohë që të mbështesin fëmijët e tyre në projekte të tilla edukativo-arsimore”, mendon zonja Krasniqi.

Si do që të jetë, ajo u bën thirrje fëmijëve dhe prindërve shqiptarë që t’i përgjigjen këtij projekti duke premtuar se do të përfitojnë shumë.

 Biografi e shkurt

  • Emri MbiemriHava Krasniqi
  • Vendi ku vepron:Adliswil-Cyrih-Zvicër
  • Profesioni:Animatore