Bota

Zbatimi i marrëveshjes së migracionit i vështirë sipas Donald Tusk

Çështja e migracionit dhe zbatimi i marrëveshjes së migracionit është i vështirë sipas Këshillit Evropian

Presidenti i Këshillit Evropian, Donald Tusk tha të premten se zbatimi i marrëveshjes së dakorduar nga 28 udhëheqës pas nëntë orësh të negociatave të vështira do të ishte pjesa më e ndërlikuar.

“Sa i përket marrëveshjes sonë për migracionin, është shumë herët të flitet për një sukses”.

“Ne kemi arritur të arrijmë një marrëveshje në Këshillin Evropian, por kjo është në fakt pjesa më e lehtë e detyrës, në krahasim me atë që na pret në terren, kur ne fillojmë ta zbatojmë atë”,tha Tusk në një konferencë shtypi në Bruksel.

Udhëheqësit e Bashkimit Evropian kanë arritur një marrëveshje mbi migracionin pas gati 10 orësh bisedimesh në samitin e Brukselit, transmeton Klan Kosova.

Italia – pika hyrëse e mijëra emigrantëve, kryesisht nga Afrika – kishte kërcënuar të vë veton ndaj përfundimeve të të gjithë agjendës së grupit nëse nuk merrte ndihmë për këtë çështje.

Bisedimet vazhduan në orët e hershme të së premtes para se të arrihej një kompromis.

Udhëheqësit thanë se qendrat e reja të emigrantëve mund të krijoheshin në vendet e BE-së në baza “vullnetare”.

Këto qendra do t’i shqyrtonin rastet me emigrantët për të përcaktuar se cilët janë refugjatë të vërtetë dhe të cilët janë “emigrantë të parregullt, të cilët do të kthehen”, thuhet në tekstin e marrëveshjes.

Megjithatë, ishte e paqartë se cilat vende do të dilnin vullnetar për krijimin e qendrave, transmeton Klan Kosova, transmeton Albinfo.ch.