Reagon edhe Trump pas ngjarjes pranë Shtëpisë së Bardhë

Autoritetet amerikane kanë nisur hetimet për të zbuluar motivet e autorit dhe për të verifikuar nëse ai kishte bashkëpunëtorë të tjerë

Presidenti i SHBA-së, Donald Trump, reagoi pas incidentit të armatosur pranë Shtëpisë së Bardhë, ku një 21-vjeçar u qëllua për vdekje nga oficerët e Shërbimit Sekret pasi tentoi të hynte në kompleksin presidencial.

Në një postim në Truth Social, Trump falënderoi Shërbimin Sekret dhe forcat e rendit për reagimin e shpejtë dhe profesional ndaj personit të armatosur, për të cilin tha se kishte një histori dhune dhe një “obsesion të mundshëm” me Shtëpinë e Bardhë.

“Falënderojmë Shërbimin Sekret të mrekullueshëm dhe Zbatimin e Ligjit për veprimin e shpejtë dhe profesional që ndërmorën sonte kundër një personi të armatosur pranë Shtëpisë së Bardhë, i cili kishte një histori të dhunshme dhe një obsesion të mundshëm me ndërtesën më të dashur të kombit tonë”, shkroi Trump, transmeton albinfo.ch.

Presidenti amerikan e lidhi ngjarjen edhe me shqetësimet për sigurinë në Uashington, duke theksuar se incidenti tregon nevojën për krijimin e hapësirave edhe më të sigurta për presidentët amerikanë në të ardhmen.

Ngjarja ndodhi të shtunën pasdite jashtë kompleksit të Shtëpisë së Bardhë, kur 21-vjeçari tentoi të kalonte përmes një pike kontrolli sigurie. Oficerët e Shërbimit Sekret iu kundërpërgjigjën me armë zjarri, duke e vrarë sulmuesin në vend. Gjatë incidentit mbeti i plagosur rëndë edhe një kalimtar.

Pas të shtënave, alarmet u aktivizuan brenda dhe jashtë kompleksit presidencial. Gazetarët që ndodheshin në sallën e shtypit u urdhëruan të qëndronin të mbuluar për rreth 40 minuta, ndërsa zona u izolua nga forcat e sigurisë.

Korrespondentja e ABC News, Selina Wang, e cila ndodhej pranë vendngjarjes, regjistroi momentin e sulmit me telefonin e saj celular. Në videon e publikuar në rrjetin social X dëgjohen dhjetëra të shtëna dhe zëra që u bërtasin njerëzve të shtrihen në tokë për t’u mbrojtur.

Autoritetet amerikane kanë nisur hetimet për të zbuluar motivet e autorit dhe për të verifikuar nëse ai kishte bashkëpunëtorë të tjerë. Ndërkohë, masat e sigurisë rreth Shtëpisë së Bardhë mbeten të përforcuara.

BREAKING: FOX News’ Chad Pergram reports on shots fired near the White House, says Secret Service took down shooter. pic.twitter.com/FvB2sdzZ2P

— Fox News (@FoxNews) May 23, 2026

I was in the middle of taping on my iPhone for a social video from the White House North Lawn when we heard the shots. It sounded like dozens of gunshots. We were told to sprint to the press briefing room where we are holding now. pic.twitter.com/iqdQwh4soq

— Selina Wang (@selinawangtv) May 23, 2026

---