Ushtruesja e detyrës së Presidentes së Republikës së Kosovës, Albulena Haxhiu, ka takuar të mërkurën kryesuesin e Komisionit Qendror të Zgjedhjeve (KQZ), Kreshnik Radoniqi, përcjell albinfo.ch.

Takimi zhvillohet në një periudhë të ndjeshme politike në vend, pas zhvillimeve të fundit dhe mosmarrëveshjeve që lidhen me procesin institucional dhe zgjedhor në Kosovë.

Sipas raportimeve, situata e krijuar pas përpjekjeve për të përmbyllur proceset brenda afateve kushtetuese ka shtuar diskutimet për hapat e ardhshëm institucionalë, përfshirë edhe mundësinë e organizimit të zgjedhjeve të reja parlamentare brenda afateve të përcaktuara ligjore.

Komisioni Qendror i Zgjedhjeve ka propozuar 7 qershorin si datë të mundshme për mbajtjen e zgjedhjeve të reja parlamentare. Kjo datë është diskutuar edhe gjatë takimit mes kryesuesit të KQZ-së, Kreshnik Radoniqi, dhe ushtrueses së detyrës së presidentes, Albulena Haxhiu.

Kosova, sipas procedurave në raste të tilla, mund të përballet me organizimin e zgjedhjeve të reja brenda 45 ditësh, nëse plotësohen kushtet kushtetuese dhe ligjore përkatëse.

Takimi mes Haxhiut dhe Radoniqit shihet si pjesë e konsultimeve institucionale në një moment me rëndësi për stabilitetin dhe zhvillimet e mëtejshme politike në vend./Albinfo.ch

Ish-presidentja e Kosovës, Vjosa Osmani, ka reaguar pas zhvillimeve të fundit politike në vend, duke dërguar një mesazh shprese dhe qëndrueshmërie për qytetarët, përcjell albinfo.ch.

Osmani ka theksuar se, pavarësisht situatave të vështira dhe krizave institucionale me të cilat është përballur Kosova, qytetarët kanë dëshmuar gjithmonë forcë për t’u ngritur dhe për të ecur përpara.

“Populli i Kosovës di të ngrihet edhe nga momentet më të rënda”, ka deklaruar Osmani.

Në reagimin e saj, ajo ka bërë thirrje për më shumë unitet dhe bashkim, duke kërkuar që në diskursin publik të largohet gjuha e urrejtjes dhe përçarjes.

Mesazhi i Osmanit vjen në kohën kur vendi po kalon një periudhë të tensionuar politike, pas dështimit për zgjedhjen e presidentit dhe shpërndarjes së Kuvendit, ndërsa pritet të caktohet data për zgjedhje të reja./Albinfo.ch

https://www.facebook.com/share/r/1CrzbvTMjm/?mibextid=wwXIfr

Kosova pritet të shkojë në zgjedhje të parakohshme parlamentare, pasi procesi për zgjedhjen e presidentit ka dështuar të përmbyllet brenda afateve kushtetuese, duke e thelluar krizën politike dhe institucionale në vend, përcjell albinfo.ch.

Pas disa tentimeve në Kuvend dhe mungesës së konsensusit politik mes pozitës dhe opozitës, partitë politike nuk arritën të sigurojnë kuorumin dhe marrëveshjen e nevojshme për zgjedhjen e kreut të shtetit.

Dështimi për zgjedhjen e presidentit e ka futur vendin në një situatë të re politike, ku zgjedhjet e jashtëzakonshme konsiderohen si epilogu i vetëm institucional për dalje nga ngërçi.

Gjatë ditës, përfaqësues të partive politike shkëmbyen akuza reciproke për përgjegjësinë e këtij dështimi. Pushteti fajësoi opozitën për mungesë bashkëpunimi dhe bojkot të seancave, ndërsa partitë opozitare akuzuan qeverinë për keqmenaxhim të procesit dhe tentativa për ta përdorur krizën për kalkulime elektorale.

Moszgjedhja e presidentit brenda afatit kushtetues hap rrugën për shpërndarjen e Kuvendit dhe organizimin e zgjedhjeve të reja parlamentare, duke e futur Kosovën në një tjetër cikël zgjedhor.

Zgjedhjet e parakohshme pritet të jenë një test i ri politik për partitë kryesore, në një kohë kur vendi përballet me pasiguri institucionale dhe polarizim të thelluar politik, ndërsa data e saktë e mbajtjes së tyre pritet të bëhet e ditur në ditët ose javët në vijim nga institucionet përkatëse./Albinfo.ch

Kryetari i Lidhjes Demokratike të Kosovës (LDK), Lumir Abdixhiku, ka komentuar mundësinë që ish-Presidentja Vjosa Osmani të jetë bartëse e listës së LDK-së në zgjedhjet e reja të jashtëzakonshme, përcjell albinfo.ch.

Abdixhiku nuk e përjashtoi një mundësi të tillë, por theksoi se ende nuk ka një vendim përfundimtar dhe se për këtë çështje duhet të ketë diskutime të drejtpërdrejta me Osmanin.

“Me siguri do të jetë dhe mund të jetë kandidate për presidente, por për këtë çështje më lejoni të diskutoj me të, duke qenë se s’është subjekt i diskutimit sot këtu dhe duhet ta pyesni edhe atë”, ka deklaruar Abdixhiku.

Deklarata e tij vjen në kohën kur vendi pritet të shkojë drejt zgjedhjeve të reja, pas shpërndarjes së Kuvendit dhe dështimit për zgjedhjen e Presidentit./Albinfo.ch

Kandidatja për Presidente të Kosovës, Feride Rushiti, ka deklaruar se e ka pranuar kandidaturën me bindjen se mund të jetë figurë unifikuese dhe të ndihmojë vendin të dalë nga ngërçi politik, përcjell albinfo.ch.

Rushiti tha se kërkesa për kandidimin i ka ardhur nga shumë qytetarë, shoqëria civile, kryeministri Albin Kurti, si dhe partnerët ndërkombëtarë. Ajo theksoi se pas diskutimeve të gjata me Kurtin, ka vendosur ta marrë këtë përgjegjësi me synimin për stabilizimin e institucioneve.

“S’kam pasur asnjëherë ambicie për pushtet. Kjo është një përpjekje e sinqertë për të kontribuar për vendin tim”, u shpreh Rushiti.

Ajo shtoi se që nga viti 1999 ka bashkëpunuar me partitë politike, duke theksuar se gjithmonë ka pasur parasysh mbrojtjen e interesave të qytetarëve.

E pyetur lidhur me thirrjet e partive opozitare që të tërhiqet nga gara, Rushiti tha se nuk është ndjerë asnjëherë pjesë e kalkulimeve politike dhe se vendimin për të hyrë në garë e ka marrë në momentin e fundit, pasi sipas saj ishin konsumuar të gjitha mundësitë e tjera.

Rushiti tha se kishte besuar se si figurë unifikuese do të mund të siguronte mbështetjen e të gjithë deputetëve në Kuvendin e Kosovës./Albinfo.ch

Pas shpërndarjes së Kuvendit të Kosovës, ka reaguar ekipi i ish-Presidentes Vjosa Osmani, përcjell albinfo.ch.

Këshilltarja e saj, Egnesa Vitija, ka publikuar në rrjete sociale një fotografi të Osmanit, duke e shoqëruar me mbishkrimin e shkurtër: “Shihemi”.

Ky reagim vjen në një kohë të zhvillimeve të reja politike, ku vendi pritet të shkojë drejt zgjedhjeve të reja.

Ndërkohë, në fjalimin e mbajtur mbrëmë, Kryeministri i Kosovës Albin Kurti ka kritikuar ish-Presidenten Osmani, duke deklaruar se ajo kishte tentuar shpërndarjen e Kuvendit përmes një dekreti që ai e cilësoi si jokushtetues.

Deklaratat dhe reagimet e fundit tregojnë për rritjen e tensioneve politike, ndërsa pritet që në ditët në vijim të ketë zhvillime të tjera lidhur me procesin zgjedhor dhe pozicionimet e partive politike./Albinfo.ch 

Kryeministri i Kosovës, Albin Kurti, ka vazhduar kritikat ndaj partive opozitare në Kuvendin e Republikës së Kosovës, duke deklaruar se, pavarësisht përpjekjeve për të sjellë figura të reja politike, opozita sipas tij vazhdon të funksionojë me të njëjtat praktika të vjetra, përcjell albinfo.ch. 

Kurti tha se problemi i opozitës nuk lidhet vetëm me emrat apo figurat që ajo i promovon, por me mënyrën e funksionimit dhe mentalitetin politik të ndërtuar ndër vite.

“Kjo opozitë mundet me sjell ndonjë fytyrë të re, por zanatin dhe karakterin e kanë të vjetër. Prandaj janë në rënie të lirë, duke rënë vazhdimisht në ciklet elektorale. Sa më shumë zgjedhje, aq më poshtë po shkojnë,” u shpreh Kurti.

Deklarata e Kurtit vjen në kohën kur Kuvendi ka kaluar në zhvillime të reja politike, ndërsa vendi pritet të shkojë drejt zgjedhjeve të reja pas dështimit të zgjedhjes së Presidentit./Albinfo.ch 

Kryetari i Lidhjes Demokratike të Kosovës (LDK), Lumir Abdixhiku, ka reaguar pas shpërndarjes së Kuvendit të Kosovës, duke deklaruar se vendi po shkon në zgjedhje të reja për shkak të, siç tha ai, qasjes së pushtetit që me 51 për qind të votave kërkoi nënshtrim, përcjell albinfo.ch. 

Abdixhiku ka thënë se LDK kishte propozuar emrin e ish-Presidentes Vjosa Osmani dhe kishte siguruar 15 nënshkrime për kandidaturën e saj, por sipas tij ky propozim u injorua.

“Kërkuan nënshkrime. Ua dhamë, 15 sosh, sa i kishim. Në fund, kërkuan gjënë e vetme që dinin, nënshtrimin. Këtë s’mund ta kishin”, ka shkruar Abdixhiku.

Ai ka shtuar se pushteti e kishte parë Vjosa Osmanin vetëm si kuorum, duke e konsideruar atë si numër plotësues për kandidaten e tyre.

“Vjosën, Presidenten e deritashme, e panë vetëm si kuorum, si numër plotësues për Presidenten e tyre ‘karate’. Ne e pamë ndryshe. E pamë siç duhet të ishte edhe me votat e tyre, një Presidente përfaqësuese dinjitoze e Republikës”, ka deklaruar ai.

Sipas Abdixhikut, dallimi mes opozitës dhe pushtetit do të vuloset nga qytetarët në zgjedhjet e ardhshme.

“Do ta vulosë populli i Kosovës. Do ta zgjedhë vet. Tani është koha për bashkimin e njerëzve të mirë të këtij vendi, që duan një Kosovë normale, pa dramë, pa propagandë, me dinjitet brenda Lidhjes Demokratike. Do ta kemi!”, ka përfunduar Abdixhiku.

Në një deklaratë publike, Abdixhiku u shpreh se nuk ka ndodhur asnjëherë që një parti politike, e cila ka fituar 51% të mbështetjes, të mos arrijë të zgjedhë presidentin, pavarësisht se ka një kandidat dhe mbështetje të deklaruar.

“Nuk ka ndodhur asnjëherë në historinë e Kosovës që një parti me 51% të mos arrijë të zgjedhë presidentin duke pasur kandidat e mbështetje’’, tha ai./Albinfo.ch 

Në Kuvendin e Kosovës, dje ka përfunduar afati i fundit kushtetues për zgjedhjen e Presidentit të vendit. Deri në orët e fundit të këtij afati, Lëvizja Vetëvendosje tentoi të sigurojë zgjedhjen e Presidentes përmes kandidates Feride Rushiti, por procesi dështoi për shkak të mungesës së mbështetjes nga partitë opozitare, përcjell albinfo.ch. 

Sipas zhvillimeve në sallë, opozita nuk e mbështeti kandidaturën e propozuar dhe, në disa tentativa radhazi, nuk qëndroi në sallën e Kuvendit, duke pamundësuar vazhdimin e procedurave dhe votimin.

Ndërkohë, Lidhja Demokratike e Kosovës (LDK) propozoi Vjosa Osmanin për Presidente, duke siguruar edhe 15 nënshkrime për kandidaturën e saj. Megjithatë, ky propozim nuk u mor parasysh dhe nuk u fut në procedurë për shqyrtim.

Pas dështimit të zgjedhjes së Presidentit brenda afatit ligjor, zyrtarisht Kosova tashmë pritet të shkojë drejt zgjedhjeve të reja parlamentare, të cilat sipas pritjeve do të mbahen pas disa muajsh.

Ky zhvillim e fut vendin në një fazë të re politike, ndërsa pritet që institucionet përkatëse të caktojnë datën dhe procedurat për mbajtjen e zgjedhjeve./Albinfo.ch