Organizata e Veteranëve të Luftës së UÇK-së (OVL UÇK) ka shprehur shqetësim për zhvillimet e fundit politike në Kuvendin e Kosovës, duke theksuar rëndësinë e respektimit të Kushtetutës dhe funksionimit të rregullt të institucioneve demokratike.

Në reagimin e saj, organizata ka kërkuar që të gjitha veprimet institucionale të jenë në përputhje të plotë me ligjet në fuqi, duke paralajmëruar se çdo proces që cenon bashkëpunimin institucional mund të rrezikojë stabilitetin demokratik dhe besimin e qytetarëve.

OVL UÇK i ka bërë thirrje shumicës parlamentare që të veprojë me maturi dhe përgjegjësi, duke siguruar procese të rregullta dhe gjithëpërfshirëse në Kuvend.

Po ashtu, organizata ka theksuar se veteranët e luftës mbeten të përkushtuar në mbrojtjen e rendit kushtetues, shtetit ligjor dhe institucioneve të Kosovës, të cilat, sipas tyre, janë ndërtuar mbi sakrificën e luftës çlirimtare.

Seanca u ndërpre për herë të dytë brenda ditës, ndërsa kryetarja e Kuvendit kërkon pjesëmarrjen e deputetëve opozitarë, përcjell albinfo.ch.

Kryetarja e Kuvendit të Kosovës, Albulena Haxhiu, ka njoftuar se seanca për zgjedhjen e presidentit, e cila u ndërpre për herë të dytë brenda ditës, do të vazhdojë sërish në orën 19:00.

Haxhiu u ka bërë thirrje edhe një herë deputetëve të opozitës që të jenë të pranishëm në sallë dhe të marrin pjesë në vazhdimin e seancës, në mënyrë që të mundësohet zhvillimi i procesit të votimit./Albinfo.ch 

Deputetët e Lëvizjes Vetëvendosje kanë hyrë në sallën e Kuvendit të Kosovës rreth 30 minuta pas orarit të paralajmëruar për vazhdimin e seancës për zgjedhjen e presidentit.

Edhe kësaj radhe, në sallë nuk është parë asnjë deputet i opozitës, duke vazhduar bojkotin e procesit të votimit.

Në nisje të seancës, kryetarja e Kuvendit, Albulena Haxhiu, u ka bërë thirrje sërish deputetëve të opozitës që të jenë të pranishëm dhe të marrin pjesë në votim, duke u bazuar në detyrimet ligjore për pjesëmarrje në punimet parlamentare.

Ajo u referua në aktgjykime të ndryshme dhe në Ligjin për Deputetët, sipas të cilit deputetët kanë obligim të marrin pjesë në seanca dhe të njoftojnë Kryetarin e Kuvendit për mungesat.

Ndërkohë, është rikujtuar edhe sqarimi i Gjykatës Kushtetuese nga viti 2016, në rastin e zgjedhjes së ish-presidentit Hashim Thaçi, ku thuhet se nuk është kriter kushtetues pjesëmarrja e të gjithë 120 deputetëve, por kërkohet përmbushja e shumicës së përcaktuar në Kushtetutë prej 80 deputetësh./Albinfo.ch

Aeroporti Ndërkombëtar i Prishtinës “Adem Jashari” ka njoftuar për disa përditësime në procedurat e udhëtimit, të cilat kanë hyrë në fuqi nga 1 prilli 2026, me synim përshpejtimin dhe lehtësimin e procesit të fluturimeve, përcjell albinfo.ch.

Sipas njoftimit zyrtar, udhëtarët këshillohen të përdorin check-in online dhe të mbajnë kartën e imbarkimit në telefon ose të printuar. Pasagjerët pa bagazh të regjistruar mund të shkojnë direkt në portën e nisjes.

Po ashtu, është theksuar se pasagjerët duhet të paraqiten në aeroport të paktën tri orë para nisjes së fluturimit, për shkak të procedurave të imbarkimit dhe mbylljes së check-in-it në kohë.

“Aeroporti u bën thirrje të gjithë pasagjerëve që të respektojnë oraret e përcaktuara sipas politikave të linjave ajrore”, thuhet në njoftim.

Autoritetet gjithashtu kanë kërkuar që gjatë regjistrimit online të plotësohen saktë të dhënat personale dhe dokumentet e udhëtimit, pasi gabimet mund të shkaktojnë vonesa ose probleme gjatë imbarkimit.

Udhëtarëve u rekomandohet të informohen paraprakisht për fluturimet e tyre dhe të ndjekin udhëzimet e linjave ajrore për një udhëtim më të shpejtë dhe më të lehtë./Albinfo.ch

Seanca e Kuvendit të Kosovës për zgjedhjen e presidentit ka nisur me rreth një orë vonesë, pasi ishte paraparë të fillonte në orën 10:00.

Kryetarja e Kuvendit, Albulena Haxhiu, ka hapur seancën duke bërë thirrje për pjesëmarrje të deputetëve nga partitë e tjera, megjithatë në sallë është e pranishme vetëm Lëvizja Vetëvendosje, ndërsa opozita ka munguar sërish.

Kryeministri Albin Kurti ka deklaruar se po bëhen përpjekje maksimale për zgjedhjen e presidentit të vendit, duke theksuar se mbetet të shihet nëse opozita do të marrë pjesë në proces.

“Ne po bëjmë përpjekjet maksimale, tash do shohim a po vinë deputetët e opozitës, që e kanë obligim kushtetues të përfaqësojnë popullin”, ka thënë Kurti para nisjes së seancës.

Procesi për zgjedhjen e presidentit po vazhdon nën një klimë të tensionuar politike, me mungesë konsensusi mes pozitës dhe opozitës./Albinfo.ch

Kosova rrezikon të hyjë në një rekord të pazakontë në Evropë, duke u shndërruar në një nga vendet me ciklin më të shkurtër zgjedhor, si pasojë e krizave të vazhdueshme politike dhe mungesës së konsensusit institucional, përcjell albinfo.ch.

Sipas të dhënave krahasuese, shumica e shteteve evropiane zhvillojnë tri palë zgjedhjet e fundit parlamentare brenda një periudhe prej 7 deri në 10 vjet, pasi mandatet zakonisht përfundojnë në mënyrë të rregullt. Ndërkohë, Kosova po shkon drejt një situate krejtësisht të kundërt.

Nëse nuk arrihet marrëveshje për zgjedhjen e presidentit dhe vendi detyrohet të shkojë në zgjedhje të reja, atëherë tri zgjedhjet e fundit parlamentare do të përfshiheshin brenda vetëm një viti e katër muajsh – një periudhë që do ta bënte Kosovën rast unik në kontinent.

Vetëm gjatë vitit 2025, Kosova mbajti dy palë zgjedhje parlamentare, ndërsa tani po përballet me mundësinë reale të një procesi të tretë zgjedhor. Zgjedhjet e dhjetorit 2025 u organizuan pas një ngërçi të gjatë politik dhe pas pamundësisë për krijimin e institucioneve stabile nga zgjedhjet e mëparshme të po atij viti.

Kriza e tanishme lidhet me pamundësinë e Kuvendit për të zgjedhur presidentin e vendit, proces i cili kërkon kuorum të caktuar dhe pjesëmarrje të gjerë të deputetëve. Dështimet në rundet e para dhe afatet kushtetuese e kanë shtyrë Kosovën drejt një momenti vendimtar, ku mungesa e kompromisit politik mund të prodhojë sërish zgjedhje të parakohshme.

Nëse skenari i zgjedhjeve të reja realizohet, Kosova do të hynte në një cikël të rrallë zgjedhor për standardet evropiane, duke reflektuar edhe më shumë pasigurinë politike dhe vështirësitë në ndërtimin e stabilitetit institucional./Albinfo.ch

Kuvendi i Kosovës ka filluar seancën e jashtëzakonshme për zgjedhjen e presidentit të vendit, ndërsa në mesnatë përfundon afati kushtetues për zgjedhjen e shefit të shtetit, përcjell albinfo.ch.

Seanca e së hënës përfundoi pa rezultat, pasi partitë opozitare bojkotuan votimin, duke pamundësuar arritjen e kuorumit të nevojshëm. Opozita e ka cilësuar procesin si shkelje kushtetuese, duke kritikuar nisjen e seancës pa praninë e 80 deputetëve.

Lëvizja Vetëvendosje ka propozuar dy emra të rinj për kandidate për presidente: Feride Rushitin dhe Hatixhe Hoxhën. Ndërkohë, kandidatët e mëparshëm të propozuar më 5 mars, Glauk Konjufca dhe Xhelal Mulhaxha, janë tërhequr nga gara.

Në rundin e parë të votimit, Rushiti mori 63 vota, ndërsa Hoxha nuk mori asnjë votë.

Nëse presidenti nuk zgjidhet deri në mesnatë, vendi do të përballet me zgjedhje të reja parlamentare./Albinfo.ch