Kuvendi i Kosovës ka miratuar në parim projektligjin për themelimin e Byrosë shtetërore për konfiskimin e pasurisë. Projektligji u mbështet nga 81 deputetë, ndërsa 25 deputetë abstenuan.

Partitë opozitare, PDK dhe LDK, kanë kërkuar ndryshime në projektligj, duke theksuar se vetëm pas përfshirjes së amendamenteve të propozuara do ta votojnë atë në fazat e ardhshme, përcjell albinfo.ch.

Gjatë seancës plenare, Zëvendëskryeministrja dhe Ministrja e Drejtësisë, Donika Gërvalla, e cilësoi këtë projektligj si një nismë me rëndësi të veçantë për shtetin dhe sundimin e ligjit, duke e lidhur atë edhe me rrugën e Kosovës drejt integrimit në Bashkimin Evropian.

Ajo u bëri thirrje të gjithë deputetëve që ta mbështesin projektligjin pa dallim të përkatësisë politike, duke theksuar se lufta kundër keqpërdorimit të parasë publike dhe konfiskimi i pasurisë së pajustifikueshme duhet të jetë interes i përbashkët.

“Lufta kundër keqpërdorimit të parasë publike, pasurisë së pajustifikueshme, forcimi i llogaridhënies dhe mbrojtja e interesit publik nuk duhet të jenë çështje të ndarjes politike, por detyrim i përbashkët shtetëror”, deklaroi Gërvalla.

Ministrja shtoi se as Komisioni i Venedikut dhe as Gjykata Kushtetuese nuk e kanë kontestuar konceptin e konfiskimit civil si instrument juridik. Sipas saj, rekomandimet për më shumë qartësi, proporcionalitet dhe garanci procedurale janë reflektuar në versionin aktual të projektligjit të paraqitur për shqyrtim në Kuvend./Albinfo.ch

Agjencia për Parandalimin e Korrupsionit (APK) ka publikuar deklarimet vjetore të pasurisë së disa prej figurave kryesore politike në vend, përfshirë kryeministrin Albin Kurti, ish-presidenten Vjosa Osmani, kryetarin e AAK-së Ramush Haradinaj dhe kryetarin e LDK-së Lumir Abdixhiku.

Në deklarimin e kryeministrit Albin Kurti, vërehen ndryshime në kursime dhe shpenzime krahasuar me vitin e kaluar. Sipas të dhënave të APK-së, Kurti ka deklaruar vetëm 16 euro e 41 centë para të gatshme në emrin e tij. Ndërkohë, në emër të bashkëshortes janë raportuar 19 mijë e 500 euro, të cilat sipas deklarimit burojnë nga paga dhe trashëgimia familjare. Po ashtu, janë deklaruar edhe 2 mijë euro kursime të vajzës dhe 50 euro të tjera nga familjarët.

Krahasuar me vitin e kaluar, kur Kurti kishte deklaruar rreth 1,800 euro kursime, këtë vit evidentohet një rënie e tyre. Ndryshim është shënuar edhe te shpenzimet për banim, pasi qiraja mujore është rritur në 350 euro, nga 250 euro sa ishte më parë.

Sa i përket pasurive të paluajtshme, nuk ka ndryshime, ndërsa është deklaruar një banesë në emër të bashkëshortes me vlerë 530 mijë euro. Në pjesën e detyrimeve figuron një kredi në emër të bashkëshortes me vlerë të mbetur prej 160 mijë euro. Ndërkohë, të hyrat vjetore të Kurtit nga paga si kryeministër janë deklaruar 21 mijë e 315 euro, ndërsa bashkëshortja ka deklaruar të ardhura vjetore prej 51 mijë eurosh.

Ndërkaq, ish-presidentja Vjosa Osmani ka deklaruar në APK mëditje në vlerë 10 mijë e 305 euro, të realizuara nga udhëtimet zyrtare jashtë vendit, përveç pagës në vlerë 33 mijë e 248 euro që e merrte si presidente.

Osmani ka deklaruar se nuk ka ndryshime të mëdha te pasuritë e paluajtshme. Në pronësi të saj figuron një arë me vlerë 35 mijë euro, si dhe një shtëpi në pronësi të përbashkët me vlerë 208 mijë euro. Ndërkohë, disa prona të tjera janë deklaruar në emër të bashkëshortit, përfshirë një banesë me vlerë 60 mijë euro, dy shtëpi në Australi me vlerë 510 mijë euro dhe 170 mijë euro, si dhe një garazh kolektiv me vlerë 5 mijë euro.

Si para të gatshme, Osmani ka deklaruar 3 mijë e 115 euro, ndërsa bashkëshorti rreth 750 euro. Si detyrime financiare, janë renditur 9 mijë euro për këste të papaguara për punë shtesë në shtëpi, si dhe 20 mijë e 500 euro huamarrje për pagesën e banimit në Melbourne. Për të hyrat e bashkëshortit janë deklaruar 11 mijë e 350 euro nga paga dhe 11 mijë dollarë nga qiraja në Australi.

Kryetari i AAK-së, Ramush Haradinaj, ka deklaruar pasuri milionëshe në formularin e tij pranë APK-së. Në deklarimin e familjes Haradinaj figurojnë tri shtëpi, tri banesa, një vilë, toka dhe truall, me vlerë totale që kap rreth dy milionë euro.

Sa i përket kursimeve, Haradinaj ka deklaruar në bankë 23,625.58 euro të ardhura nga paga dhe qiratë, ndërsa bashkëshortja e tij Anita Haradinaj ka deklaruar 8,311.33 euro, po ashtu nga qiratë.

Ndërkohë, kryetari i LDK-së, Lumir Abdixhiku, ka deklaruar dy prona të reja krahasuar me vitin e kaluar. Bëhet fjalë për dy banesa në pronësi të bashkëshortes, njëra me vlerë 120 mijë euro dhe tjetra 100 mijë euro, të cilat janë të trashëguara nga prindërit.

Në deklarim përfshihen edhe pasuri të tjera të paluajtshme, si një shtëpi në pronësi të përbashkët me vlerë 200 mijë euro, një banesë e përbashkët e blerë me kredi bankare me vlerë 265 mijë euro, si dhe një shtëpi e trashëguar prej 200 metrash katrorë me vlerë 150 mijë euro.

Abdixhiku ka deklaruar edhe një veturë Mercedes-Benz të vitit 2019, me vlerë 25 mijë euro, në emër të bashkëshortes. Po ashtu, bashkëshortja e tij zotëron 25% të aksioneve në kompaninë “AMPERA GROUP”, pa një vlerë të specifikuar.

Në aspektin financiar, Abdixhiku ka raportuar 386 euro kursime dhe depozita bankare, ndërsa ka deklaruar edhe 4,915.36 euro të ardhura nga paga. Bashkëshortja e tij ka deklaruar 4,293.40 euro nga paga dhe kursimet.

Sa i përket kredive, ai ka bërë të ditur se ka një kredi për renovimin e shtëpisë me shumë të mbetur prej 32,502 euro, si dhe një kredi tjetër për blerje banese me detyrim të mbetur prej 126,020.40 euro. Në total, të ardhurat vjetore të Abdixhikut arrijnë 16,889 euro nga paga, ndërsa ai ka deklaruar edhe 24 mijë euro të tjera nga një angazhim shtesë.

Kryetari i PDK-së Badri Hamza në deklarimin vjetor të pasurisë ka treguar se i ka dy banesa, një me sipërfaqe 120 metër katror në vlerë 70 mijë euro dhe një më sipërfaqe 98 metër katror në vlerë 46 mijë euro.
Ai ka deklaruar se i ka në pronësi edhe tri garazhe në vlerë 14 mijë e 700 euro së bashku.
Gjithashtu ka deklaruar se ka një hektar tokë në vlerë 50 mijë euro dhe një shtëpi prej 72 metrash katror në vlerë 25 mijë euro. Ndërkohë në emër të bashkëshortes ai ka deklaruar një banesë prej 60 metrash katror në vlerë prej 39 mijë euro.
Para të gatshme ai ka deklaruar se ka mbi 10 e 700 euro në një llogari dhe 1408 euro në një llogari tjetër.
Ai ka deklaruar të ardhura vjetore personale në vlerë prej afër 19 mijë e 700 euro. 

Publikimi i këtyre deklarimeve nga APK-ja synon rritjen e transparencës dhe monitorimin e pasurisë së zyrtarëve publikë, në kuadër të mekanizmave të parandalimit të korrupsionit./Albinfo.ch

Ministri i Mbrojtjes i Shqipërisë, Ermal Nufi, është pritur me ceremoni ushtarake nga ministri i Mbrojtjes i Kosovës Ejup Maqedonci, përcjell albinfo.ch.

Ministri i Mbrojtjes i Shqipërisë, Ermal Nufi ka deklaruar se nuk ka asnjë ndryshim të planeve të sigurisë së KFOR-it në Kosovë.

Nufi në konferencën për media të mbajtur pas takimit që e ka zhvilluar me ministrin e Mbrojtjes Ejup Maqedonci ka thënë se kjo i është konfirmuar në takimet që ka pasur në Bruksel me sekretarin e përgjithshëm të NATO-s, Mark Rutte por edhe me kryetarin e Komitetit Ushtarak të NATO-s, Giuseppe Vaco Dragone.

Në këto takime, ai ka thënë se ka ngritur shqetësimin për nivelin e sigurisë në Kosovë por edhe rajon.

“Në të dyja takimet, si me zotëri Rutte si me zotëri Dragone u konfirmua që nuk ka një ndryshim të paktën deri më sot të planeve të sigurisë së KFOR-it për sa i përket angazhimit të KFOR-it në Republikën e Kosovës. Besoj që të gjitha zhvillimet tjera do të adresohen në kuadër të bashkëpunimit që ne kemi në kemi në aleancë. Besoj që situata e sigurisë në Kosovë, për sa kohë ne i bëjmë të gjitha detyrat e shtëpisë, si në Kosovë por edhe si në kuadër të aleancës vazhdon të ngelet e qëndrueshme. Shqetësimet patjetër që i kemi përcjell, jemi shpresëplotë dhe të sigurt që vëmendja është e plotë për situatën e sigurisë në rajon por edhe situatën e sigurisë në rajon por edhe situatën e sigurisë në Kosovë”, ka thënë Nufi.

Kur u pyet për armatimin e Serbisë nga Kina, Nufi tha se kjo i takon këtij vendi.

“Republika e Serbisë i vendos vet çështjet e armatimit apo jo apo se si i konsideron çështjet e sigurisë së saj. Shqipëria si anëtare e NATO-s por edhe Kosova për sa kohë kemi misionin KFOR edhe qasja dhe vet evokimi që vet Qeveria e Kosovës ka në lidhje me sigurinë, besoj që të gjitha strategjitë e sigurisë i ka në përputhje dhe koordinim të plotë me NATO-n që është edhe gur themeli i garancisë së sigurisë jo vetëm në Kosovë por edhe rajon, për sa kohë që shumica e shteteve në rajon janë shtete anëtare të NATO-s”, u shpreh ai.

Maqedonci tha se kanë diskutuar për ndërtimin e kapaciteteve ushtarake dhe bashkëpunimit në aspektin e mbrojtjes me Shqipërinë.

“Diskutuam edhe mundësitë e thellimit të bashkëpunimit edhe në fushat tjera duke përfshirë industrinë e mbrojtjes, një sektor jashtëzakonisht i rëndësishëm dhe i domosdoshëm për kohët ku po jetojmë dhe në ditët në vijim, në muajt në vijim do të punojmë më gjerësisht edhe më thellësisht në identifikimin e mundësive për bashkëpunim në këtë fushë. Unë jam falënderues ndaj ministrit për gjithë gatishmërinë, për të mbështetur Kosovën edhe në rrugën e integrimit në NATO për promovimin e Kosovës në kuadër të NATO-s dhe organizmave tjerë që e bën Shqipëria, por në veçanti ministri i Mbrojtjes, si dhe në bashkëpunimin që kemi regjional edhe me Kroacinë edhe me Shqipërinë në këtë aspekt”, ka thënë ai.

Ai ka folur se cili mund të jetë bashkëpunimi me Shqipërinë sa i përket fushës së industrisë ushtarake.

“Ne kemi bërë tashmë një kontratë për një fabrikë për prodhimin e municioneve, jemi gjithashtu në koordinim me partnerët tjerë për çështjen e bashkëprodhimit. Kur flasim për bashkëpunimin me Republikën e Shqipërisë, në fushën e industrisë së mbrojtjes po flasim për dy drejtime. Është bashkëprodhimi do të shikojmë mundësitë se në cilat fusha mund të bashkëprodhojnë dhe kjo do të bëhet në periudhën në vazhdim kur do të krijojmë edhe grupet edhe ekipet që do të punojnë në identifikimin se çka mund të bashkëprodhojmë bashkë, në mënyrë që të jemi edhe të ndërveprueshëm në aspektin operacional edhe në bashkëprokurim të sistemeve të cilat na bëjnë të ndërveprueshëm”, shtoi ai. /KP

Deputeti i Lidhjes Demokratike të Kosovës (LDK), Lutfi Haziri, ka deklaruar se partia e tij dhe Lëvizja Vetëvendosje janë duke zhvilluar konsultime për arritjen e një marrëveshjeje lidhur me zgjedhjen e presidentit të ri të Kosovës./Albinfo.ch

Haziri tha se qëllimi i këtyre diskutimeve është arritja e një marrëveshjeje sa më të shpejtë, me synim garantimin e funksionalitetit institucional dhe shmangien e një krize politike.

Në një deklarim para seancës së Kuvendit, Haziri mohoi se në këto konsultime po diskutohet për ndarje apo ndërrim pozicionesh politike, duke theksuar se bëhet fjalë vetëm për çështjen e zgjedhjes së presidentit.

Sipas tij, bashkëpunimi politik është i domosdoshëm për të siguruar funksionimin normal të institucioneve të vendit.

Një ditë më parë, edhe kryeministri Albin Kurti kishte konfirmuar se janë në komunikim me kryetarin e LDK-së, Lumir Abdixhiku, lidhur me çështjen e presidentit, duke shtuar se rezultatet do të bëhen publike kur të arrihen.

Pas zgjedhjeve të 28 dhjetorit, subjektet politike ende nuk kanë arritur konsensus për zgjedhjen e kreut të shtetit. Seanca e fundit për zgjedhjen e presidentit u bojkotua nga opozita, ndërsa në të Vetëvendosje fillimisht propozoi Glauk Konjufcën, e më pas edhe Fatmire Kollçaku-Mulhaxha.

Seanca nuk u zhvillua deri në fund, pasi në momentin e votimit nuk ishin të pranishëm të paktën 80 deputetë, numër i kërkuar në raundin e parë dhe të dytë të zgjedhjes.

Ndërkohë, Konjufca është shprehur se është i gatshëm të tërhiqet nga gara nëse opozita arrin të propozojë një kandidat unifikues, duke theksuar se përgjegjësia për një emër konsensual i takon opozitës.

Gjykata Kushtetuese ka caktuar 28 prillin si afat të fundit për zgjedhjen e presidentit të ri nga Kuvendi i Kosovës./Albinfo.ch

Ish-presidentja e Kosovës, Vjosa Osmani ka përkujtuar Masakrën e Poklekut për të cilën tha se është dëshmi e gjenocidit të kryer në Kosovë, përcjell albinfo.ch.

Përmes një postimi në Facebook, Osmani kujtoi viktimat e kësaj masakre duke potencuar që në këtë gjenocid u vranë kryesisht fëmijë dhe gra.

“Liri Muqolli ishte 6 muajshe kur së bashku me 53 anëtarë të familjes, kryesisht fëmijë e gra, u ekzekutuan, u dogjën njëherë, pastaj u dogjën sërish. Liri kishte emrin, por lirinë nuk e arriti kurrë”, ka shkruar Osmani.

Postimi i plotë:

Liri Muqolli ishte 6 muajshe kur së bashku me 53 anëtarë të familjes, kryesisht fëmijë e gra, u ekzekutuan, u dogjën njëherë, pastaj u dogjën sërish.

Liri kishte emrin, por lirinë nuk e arriti kurrë.

Kushdo që thotë se në Kosovë nuk është kryer gjenocid, le të shkojë në Poklek e në çdo pjesë të Kosovës. Dëshmitë e holokaustit të kryer në Kosovë janë akoma të freskëta.

Në këte përvjetor të masakrave në Poklek e Çikatovë, kujtojmë e nuk harrojmë kurrë.

Lavdi e përjetshme të gjithë martirëve të lirisë.

Prokurorja e Shtetit, Javorka Perlinqeviq, në çështjen penale për vrasjen e Liridona Ademajt, ka kërkuar burgim të përjetshëm për tre të akuzuarit, Naim Murseli, Granit Plava dhe Kushtrim Kokalla, raporton Klankosova.tv

Propozimi për shpalljen e tyre fajtorë, u dha në fjalën përfundimtare, të mbajtur sot në Gjykatën Themelore në Prishtinë.

“Prokuroria i propozon gjykatës që të sjellë aktgjykim dënues dhe të akuzuarit t’i shpallë fajtorë, duke i dënuar me burgim të përjetshëm” tha prokurorja.

Gjatë fjalës përfundimtare, Perlinqeviq po ashtu tha se gjatë shqyrtimit gjyqësor janë paraqitur tre versione të ndryshme të ngjarjes nga të akuzuarit, që paraqesin përpjekje për shmangie të përgjegjësisë penale dhe bartje të fajit te të tjerët./Albinfo.ch