Sport

Drita eliminon kampionët e Gjibraltarit, do të ndeshet me Malmon e Suedisë

Qendërmbrojtësi Liridon Leci ka shënuar dy golat për kampionët e Kosovës, një Gjevdet Shabani dhe një Haxhi Neziraj

Kampionia e Kosovës në futboll, Drita ka mundur kampionin e Gjibraltarit, Lincoln, si mysafir me rezultat 4:1, shkruan albinfo.ch.

Kështu Drita kaloi parakualifikimet e Ligës së Kampionëve, dhe në rrethin e parë të Ligës së Kampionëve, do të ndeshet me kampionin e Suedisë, Malmon.

Drita e filloi për mrekulli dhe që në minutën e dytë arriti të shënojë me anë të mbrojtësit Liridon Leci. Futbollisti i disa skuadrave kosovare u gjend më së miri në zonë, duke kaluar gjilanasit në epërsi.

Bardhekaltrit kishin edhe disa raste të mira shënimi, madje, duke u gjendur disa herë përballë portierit kundërshtar, por pa arritur dot të shtojnë epërsinë.

Kjo iu hakmor gjilanasve, ku në minutën e 61-të, Corral barazon shifrat në 1:1.

Deri në fund të kohës së rregullt kishte edhe disa raste shënimi nga skuadrat, por pa arritur të tundin rrjetën e portës kundërshtare, dhe kështu ndeshja shkoi në vazhdime.

Në minutën e 100-të, Fidan Gërbeshi i Dritës u ndëshkua për herë të dytë me karton të verdhë dhe doli nga loja, derisa Lopes i vendasve gjashtë minuta më vonë u ndëshkua me karton të kuq, pasi ndali topin me dorë dhe u akordua penallti për kampionët e Kosovës.

I pagabueshëm nga pika e bardhë ishte Liridon Leci, i cili shënoi për 2:1. Gjevdet Shabani shënoi në minutën e 120-të për 3:1, derisa Haxhi Neziraj tre minuta më vonë për 4:1.