Dy të vdekur në aksidente trafiku në 24 orët e fundit

Dy persona kanë vdekur në dy aksidente trafiku në 24 orët e fundit në vend.

Policia njofton se aksidenti i parë ka ndodhur mbrëmë rreth orës 22:00, në rrugën Prishtinë – Mitrovicë në fshatin Babimost të Obiliqit ku vetura Renault Clio,  e cila për shkaqe aktualisht të panjohura, ka humbur kontrollin dhe ka goditur mbrojtësen e rrugës.

“Si pasojë e këtij aksidenti, lëndime të rënda kanë pësuar dy persona , njëri prej të cilëve nuk ka arritur t’u përballojë plagëve të shkaktuara nga aksidenti dhe i njëjti ka vdekur”, thuhet në njoftimin e policisë.

Ndërsa, një person tjetër ka vdekur në një aksident në fshatin Partesh të Gjilanit. Në këtë aksident kanë pësuar lëndime katër persona tjerë, njëri prej të cilëve është dërguar në QKUK. Policia njofton se ka arrestuar një serb pasi me veturën e tij nga pakujdesia, ka goditur veturën e viktimës.