Erion Kaso, sipërmarrësi më i mirë i huaj në Itali

Madje vitin e kaluar, dyqani i tij i akulloreve u rendit mes 10 më të mirave në Itali falë gamës së gjerë me 30 shije të ndryshme me cilësi të lartë

Çmimi i sipërmarrësit më të mirë të huaj në Itali këtë vit i ka takuar një emigranti shqiptar. Erion Kaso, 38 vjeç, u vlerësua nga juria në Romë në kategorinë e rritjes së biznesit, për suksesin e punishtes së tij të akulloreve në Padova.

Erioni u largua nga vendlindja e tij, Përmeti, në vitin 1997, vetëm 16 vjeç, për të emigruar fillimisht në Greqi. Pas shtatë viteve shkollë e punë atje, ai u zhvendos në Itali për të ndjekur të fejuarën, Elisa Lazzaretto, me të cilën ka sot një fëmijë, shkruan ‘Scan’.

Fillimisht, Kaso punoi si punonjës në dyqanin e akulloreve “Gianni”, të cilin ai vetë në vitin 2013 mundi ta ngrejë drejt suksesit. Disa vite më vonë, Kaso hapi edhe një dyqan tjetër dhe sot planifikon një të tretë. Madje vitin e kaluar, dyqani i tij i akulloreve u rendit mes 10 më të mirave në Itali falë gamës së gjerë me 30 shije të ndryshme me cilësi të lartë, përcjell albinfo.ch.

Krahas shqiptarit, çmimet për sipërmarrësit e huaj morën edhe tre biznesmenë të tjerë nga Kina, Rumania dhe Ruanda për kategori të ndryshme. Çmimet jepen për të nderuar kontributin ekonomik të emigrantëve në ekonominë e Italisë, të cilët me sipërmarrjet e tyre zënë 10% të PBB.