Gazetarja hulumtuese plagoset në Podgoricë

Një gazetare malazeze është sulmuar me armë zjarri në afërsi të banesës së saj në Podgoricë.

Sipas policisë malazeze, Olivera Llakiq ka mbetur e plagosur në këmbën e saj të djathtë, por fatmirësisht është jashtë rrezikut për jetë, përcjell albinfo.ch.

Gazetarja 49-vjeçare është e njohur për shkrimet e saj hulumtuese, që akuzojnë Qeverinë se favorizon biznesmenë të fuqishëm në vend përmes tenderëve dhe lehtësive të tjera të jashtëligjshme.

Kjo është hera e dytë që e njëjta gazetare sulmohet për shkak të detyrës së saj. Gjashtë vite më parë ajo u godit me sende të forta në kokë dhe qëndroi për disa ditë në spital.

Policia malazeze thotë se ka nisur hetimet për identifikimin dhe kapjen e autorëve, ndërkohë që sulmi u dënua nga Ambasada e Bashkimit Evropian dhe nga ajo e Shteteve të Bashkuara në Podgoricë.