Haradinaj pret që vizat të hiqen në vjeshtë

Kryeministri i Kosovës, Ramush Haradinaj ka shfaqur besimin se heqja e vizave për qytetarët e Kosovës, si vendi i fundit në rajon që nuk gëzon këtë të drejtë, do të ndodhë në vjeshtë.

Ai këto komente i bëri pas mbledhjes së Qeverisë së Kosovës, me ç’rast theksoi se pritet që BE-ja në periudhën deri në pesë javë të konfirmojë se vendi ynë ka kryer të gjitha obligimet sa i përket heqjes së vizave, përcjell albinfo.ch.

“Dua të jem i sinqertë me ju. Ne presim që institucionet e BE së në periudhën diku 4 javë apo 5, të konfirmojnë që Kosova i ka kryer obligimet për liberalizim. Pastaj nuk do të thotë se i marrim menjëherë vizat. Duhet të jemi të kujdesshëm. Për shkak se qeveritë veç e veç, mund të kenë kërkesa të posaçme. Diku ka vjeshta shpresoj, nuk po jap data, sepse  se mund të thonë qe po ndërhynë në datat tona. Por dikur kah vjeshta besoj se do të udhëtojmë lirshëm”, tha ai.

Ndryshe, Qeveria ka ndarë  57 mijë e 944 euro, për pagesën e punonjësve me kontrata për shërbime të veçanta në rezidencën presidenciale “Ibrahim Rugova”.