Mbyllet korridori ballkanik për refugjatët

Korridori i Ballkanit tashmë është mbyllur, pritet konfirmimi zyrtar nga BE-ja.

Autoritetet kroate kishin filluar një përzgjedhje më të ashpër të refugjatëve që vijnë nga Maqedonia dhe Serbia. Kjo do të thotë se korridori i Ballkanit praktikisht tashmë është mbyllur.

Edhe autoritetet kufitare serbe dhe maqedonase kanë marrë një listë të re për zgjedhjen e refugjatëve.

Këto rekomandime të reja janë aplikuar në terrenin në kufirin maqedonaso-grek.

Samiti i BE-së duhet të ketë prioritet publikimin e vendimit për ndalimin e fluksit të paligjshëm të refugjatëve në rrugën ballkanike, shkruan gazeta e Vjenës “Standard”, përcjell albinfo.ch.

Kjo do të paraqitet nesër në samitin e parë të BE-së me Turqinë, dhe pastaj në samitin e shefave të shteteve dhe qeverive të 28 vendeve anëtare.

Pritet që në të ardhmen Turqia në mënyrë konstruktive të bashkëpunojë në kontrollin e kufijve të jashtëm të BE-së dhe që do të pranojë të kthehen refugjatët që nuk kanë të drejtë për azil.

Bashkimi Evropian do të angazhohet edhe në Greqi me gjithë ndihmën e mundshme, duke përfshirë edhe atë financiare, dhe do të dërgojë oficerë në një agjenci të përbashkët kufitare të BE-së, Frontex, në kufirin mes Greqisë, Maqedonisë dhe Shqipërisë.

Ekziston frika, sidomos në Romë, që emigrantët do të bëjnë përpjekje për të udhëtuar në veri nëpërmes Shqipërisë dhe Italisë.