Ndeshje e vështirë për Kosovën

Takimi në Antalia fillon nga ora 18:00, derisa Përfaqësuesen e Kosovës do ta përkrahin edhe një grup i tifo-grupit ‘Dardanët’

Kosovën e pret një ndeshje shumë e vështirë kundër Turqisë. Kjo shihet si njëra nga përballjet më të vështira për Përfaqësuesen kosovare gjatë kualifikimeve për Botërorin e Rusisë, shkruan albinfo.ch.

Përzgjedhësi i Kosovës, Albert Bunjaki, është shprehur se kjo sfidë është shumë e vështirë.

“Jemi në një grup shumë të fortë. Gjendja e ekipit është e mirë. Bernard Berisha ka pasur pak temperaturë dhe do të shohim deri në fund. Kemi edhe disa futbollistë që do të na bashkohen. Atdhe Nuhiu mbetet në planet tona dhe të tjerë. Objektivi ynë është Evropiani 2020, ndërsa në këto eliminatore duhet të bëjmë maksimumin për pikë që të ngjitemi në renditjen e FIFA-s”, ka thënë Bunjaki.

Samir Ujkani po ashtu ka shtuar se i pret një takim i vështirë. “Turqia është njëra ndër ekipet më të forta në grup. Ajo e dëshiron shumë fitoren sepse ka edhe krizë te rezultateve, por ne duhet të kemi kujdes dhe ta zhvillojmë lojën tonë, ne jemi përgatitur teknikisht për t’i ndalur, me pak fat edhe mund të marrim pikë”, deklaroi kapiteni i Kosovës.