Rrustemit i organizohet pritje prej kampioni

Boksierit shqiptar i është organizuar pritje madhështore. Erzen Rrustemi i ka falënderuar mikpritësit dhe ka theksuar se kjo e motivon që të punojë edhe më shumë

Boksierit shqiptar, Erzen Rrustemi i është organizuar pritje madhështore në aeroportin e Prishtinës edhe më pas në qytetin e Gjilanit, raporton albinfo.ch.

Rrustemi ditë më parë u shpall kampion i botës në versionin WBF. Ai është nga Zhegra e Gjilanit. Qindra njerëz e kanë pritur në aeroport me flamuj shqiptarë dhe kanë brohoritur ‘Mirë se vjen kampion’.

Ai ka falënderuar edhe kryetarin e Gjilanit, Lutfi Haziri. “E di që ju kam gëzuar me suksesin e fundit, ku u shpalla kampion bote në versionin WBF dhe unë jam shumë i lumtur për këtë. Kjo pritje dhe mbështetje e manifestuar gjatë gjithë kohës, prej që jam në boksin profesionist, më motivon dhe më obligon për të punuar edhe më shumë që të sjellë edhe tituj të tjerë”, ka thënë boksieri shqiptar në konferencën për media.

Edhe Lutfi Haziri është shprehur se është nder të presësh kampionin e botës dhe organizimi është gjëja më e vogël që kanë mundur të bëjnë për të.

Në Gjilan i është organizuar edhe një pritje për kampionin shqiptar, i cili jeton dhe vepron në Zvicër.