Sport

Sami Morina përfaqëson Kosovën në garën e Ironman në Majorka të Spanjës

“Po përfundoja garën në Ironman, si njeriu i parë që përfaqëson Kosovën në këtë garë”, shtoi tutje Morina

Garuesi shqiptar, Sami Morina, i cili vepron në Zvicër nuk e ka ndërmend të ndalet. Ai ka përfaqësuar Kosovën në garën e Ironman (tre garësh) në Majorka të Spanjës, shkruan albinfo.ch.

Ai është shprehur se ka realizuar ëndrrën. “Gjatë fillimit të garës më sundonte adrenalina. Fillova garën rreth orës 07:50 dhe kisha shumë emocione. Kam notuar 1.9 kilometra për 28 minuta dhe më pas kam marr biçikletën për të përshkruar shtegun malor në Majorka me lartësi mbidetare prej 950 metrave. Kishte shumë vështirësi, por edhe kënaqësi”, është shprehur Sami Morina për albinfo.ch.

Më pas ka filluar gara tjetër e vështirë, duke vrapuar. “Kur kemi arritur në Alcudia, kishte festë të madhe dhe me duartrokitje arrita tek ndërrimi i zonës 90 kilometra me kohën 2:36, dhe më pas kam filluar të vrapoj me një temperaturë prej 23 gradë Celsius, megjithatë, në mendja kishte vetëm të përfundoj garën. Përfundova vrapimin prej 21 kilometrave për 1:30 orë, dhe ishte ndjesia më e bukur në ato momente, ishte realizimi i ëndrrës time. Po përfundoja garën në Ironman, si njeriu i parë që përfaqëson Kosovën në këtë garë”, shtoi tutje Morina.