Shqipëri, euro në nivelin më të ulët në 8 vjetët e fundit

Monedha e përbashkët evropiane ka vazhduar të zhvlerësohet në tregun e Shqipërisë, duke u këmbyer me 134.5 lekë. Ndonëse në bursat ndërkombëtare euro është afër nivelit më të lartë në një vit, në 1.12USD, në Shqipëri euro është afër niveleve më të ulëta në gati 8 vjet.

Euro po këmbehet në tregun vendës me rreth 134.5 lekë, njësoj si në dhjetor 2016, kur ajo zbriti në bursa në 1.05 USD, raporton Monitor, përcjell albinfo.ch.
Grafiku “Kursi i këmbimit lek-euro dhe euro-USD në bursa” tregon qartë se në prill-maj të këtij viti kursi në vend ka ecur në të kundërtën e bursës ndërkombëtare, çka tregon se janë faktorët e brendshëm ata që e përcaktojnë forcimin e lekut dhe rënien e euros.

Aktorët e tregut pohojnë se mbioferta në valutë dhe kërkesa e ulët për të ka sjellë që euro të zhvlerësohet përkundrejt monedhës vendëse, ku në të njëjtën datë një vit më parë euro këmbehej 3.6 lekë më shumë.

Ekspertët e tregut thonë se në treg nuk ka kërkesë për valutën, ndërsa oferta në lek mbetet e ulët për shkak të rënies së investimeve dhe shpenzimeve të ulëta buxhetore. Për 4 mujorin buxheti rezultoi me një suficit prej 11 miliardë lekësh, nga 1.4 miliardë lekë që ishte plani, sipas të dhënave zyrtare nga Ministria e Financave.