Skender Ademi për të dytën herë me radhë, shofer i vitit në regjion

Fillimisht u kishte bërë thirrje udhëtarëve që të mos e votonin këtë vit, në mënyrë që t`i jepnin shansin ndonjë shoferi tjetër. Por ndodhi ndryshe. “Një dhuratë e hershme për Krishtlindje”, qeshet ai

Me një buzëqeshje që ia mbulon fytyrën, Skënder Ademi ia lë kolegut të tij në linjën 635 të autobusëve të aeroportit disa monedha në dorë. “Ja, blije një kafe. Të uroj: Gëzuar Krishtlindjen”, thotë Ademi dhe ulet në vendin e shoferit të autobusit: tepër i përpiktë.

Skënderi nuk është çfarëdo shoferi: ai është zgjedhur për herë të dytë me radhë shofer i vitit në qarkun Freising, landi (republika) i Bavarisë. Ai ka përmbushur kriteret si: mirësia, përpikëria dhe gatishmëria për të dhënë informacione, shkruan gazeta Süddeuteche Zeitung.

“Kjo ndjenjë nuk mund të përshkruhet, është e pabesueshme”, thotë ai. Fillimisht u kishte bërë thirrje udhëtarëve që të mos e votonin këtë vit, në mënyrë që t`i jepnin shansin ndonjë shoferi tjetër. Por ndodhi ndryshe, transmeton albinfo.ch.  “Një dhuratë e hershme për Krishtlindje”, qeshet ai.

Skender Ademi thotë se si shofer autobusi ai ka shumë kërkesa ndaj vetes. Ai nuk dëshiron të rrijë i heshtur por synon që të jetë në gjendje gatishmërie për pasagjerët. Ata i konsideron si pjesë të familje. Për të qenë me kohë në punë, ai nuk fle asnjëherë më shumë se katër orë. Aq i përkushtuar është që t`i sjellë udhëtarët me kohë në destinimin e synuar sa që thotë se ka një zgjidhje sekrete edhe në rastet kur autobusi mbetet në kolonë. “Atë nuk ia tregoj askujt”, thotë Skenderi dhe shton se gjithmonë fiton duartrokitje, përcjell albinfo.ch. “Pasagjerët nganjëherë më ofrojnë çokolata, e kolegët më qerasin me pije. Ndërsa shefja kësaj here si shpërblim m`i ka dhënë dy javë të lira”:

Shoferi më i dashur i regjionit është 47 vjeçar dhe vjen nga Kosova, ku ka studiuar makinerinë. Por, pas dy semestrash atij i ishte dashur, për shkak të rrethanave të luftës, të ndërpriste studimet dhe të migronte në Gjermani ku jeton bashkë me gruan dhe katër fëmijët, transmetion albinfo.ch. Pas punëve të ndryshme në ndërtim, ai prej katër vitesh e gjysmë punon si shofer autobusi.

LAJME INTERESANTE NGA INTERNETI