Thaçi ia dorëzoi ekipit olimpik flamurin e Kosovës

Presidenti i Kosovës, Hashim Thaçi, ia dorëzoi ekipit olimpik flamurin e Kosovës, i cili do të marrë pjesë në Lojërat Olimpike Dimërore “PyeongChang 2018”, që do të mbahen në Korenë Jugore, përcjell albinfo.ch.

Ai tha se sot është një moment i veçantë për Kosovën, ngase për herë të parë në histori po merr pjesë në Lojërat Olimpike Dimërore.

“Shpresoj që nuk do të jetë lajm vetëm pjesëmarrja, por do të kemi edhe lajm të fuqishëm fitimin e ndonjë medalje”, theksoi presidenti Thaçi. Ndërsa, Besim Hasani kryetar i Komitetit Olimpik të Kosovës, falënderoi presidentin Thaçi për dorëzimin e flamurit, duke shprehur besimin e tij se kjo do të ndikojë në motivimin e Albinit.

Ndërkaq, skitari Albin Tahiri, i cili do të përfaqësojë Kosovën në “PyeongChang” është shprehur i lumtur që do të përfaqësojë Kosovën në këto gara “President, do të ndiheni krenar”, shtoi Albin Tahiri.