Vazhdon kërkimi për policët: Haradinaj, i nervozuar me thashethemet

Operacioni i kërkimit nga Forca e Sigurisë së Kosovës e Policia po vazhdon për gjetjen e dy policëve të zhdukur në lumin Lepenc të shtunën në mbrëmje. Pjesëtarë të shumtë të njësive të kërkimit kanë vazhduar punën edhe në rrjedhën e lumit Lepenc, përcjell albinfo.ch.

Ndërsa në ditën e pestë, pasi bëri disa kritika edhe zhytësi Ismajl Kasumi me ekipin e tij u është bashkuar kërkimeve. Por kryeministri Ramush Haradinaj në seancën plenare të Kuvendit ka thënë se e konsideron shqetësim zhdukjen e dy policëve të Kosovës, që dyshohet se kanë rënë në lumin Lepenc.

“Më së vështiri e kanë familjarët, të afërt dhe bashkëpunëtorët e tyre, e vërteta është që ka koordinim atje, dhe ka vullnet për çfarëdo përkrahje, qoftë të zhytësve, mirëpo ekziston edhe një praktikë, disa duke qëndruar në Prishtinë në kafene, po u japin këshilla atyre atje qysh ta bëjnë punën, i kemi dëgjuar disa kësi ekspertësh, nuk është në rregull ashtu”, ka deklaruar Haradinaj.

Ai e ka quajtur shqetësuese edhe mungesën e sigurimeve për Policinë e Kosovës.