Archives

Petrit Vllasi krijon kompaninë e parë shqiptare në Zvicër, të specializuar vetëm për hipoteka

Posted on by albinfo.ch

Çfarë duhet të keni parasysh kur vendosni të blini një shtëpi apo apartament në Zvicër, cilat janë kriteret e përgjithshme për të marrë hipotekë… Për këto dhe të tjera, përgjigjet eksperti, Petrit Vllasi

Profesionist me përvojë më shumë se një dekadë në sektorin e financave, Petrit Vllasi tashmë ka krijuar kompaninë e parë shqiptare në Zvicër, të specializuar vetëm për hipoteka. Ndërsa, për të ndihmuar komunitetin shqiptar në Zvicër, Vllasi në kompaninë e tij ofron shërbime në shqip si dhe katër gjuhë të tjera.

Në një intervistë për Albinfo.ch, ndër të tjera ai ka treguar se çka duhet pasur parasysh kur vendosni të blini një shtëpi apo apartament, cilat janë mundësitë e financimit në rast të këtyre blerjeve në Zvicër, cilat janë kriteret e përgjithshme për të marrë një hipotekë, e shumë detaje tjera të rëndësishme.

Albinfo.ch: Kompania e parë  shqiptare e specializuar në Zvicër vetëm për hipoteka, pse vetëm në këtë sektor?

Petrit Vllasi: Lëmi i hipotekave është vendi ku unë kam hedhur themelet e mia në botën profesionale. Është sektori në të cilin pas shumë viteve përvojë mund ta konsideroj veten profesionist. Dhe si profesionist, kam ndërmend të kontribuoj për komunitetin tonë duke sjellë të gjitha njohuritë e mia për nevojat dhe kërkesat e tyre.

Albinfo.ch: Keni kaluar nëpër disa institucione financiare, jo pak të njohura. Përse vendoset të krijoni kompaninë tuaj, që do të merret vetëm me hipoteka?

Petrit Vllasi: Duke shijuar mbi 10 vite përvojë në një nga gjigantët më të mëdhenj financiarë në botë, e vetmja mënyrë për të krijuar produktin dhe shërbimet e mia për komunitetin shqiptar ishte kjo, nëpërmjet sipërmarrjes.

Albinfo.ch: Kohët e fundit sipërmarrësit shqiptarë në Zvicër kanë depërtuar fuqishëm në tregun e patundshmërive. Sa është i njohur sektori hipotekar?

Petrit Vllasi: Fusha e hipotekave është shumë komplekse, jo vetëm për komunitetin tonë. Fatkeqësisht, shpesh për arsye gjuhësore, nuk merren të gjitha informacionet themelore mbi këtë temë. Kjo do të thotë se sektori i hipotekave mbetet për ne shqipfolësit një botë ende e pazbuluar dhe me handikape të ndryshme.

Albinfo.ch: Shërbimet e «financa AG» ofrohen në disa gjuhë, në mesin e tyre edhe në gjuhën shqipe?

Petrit Vllasi: Po, financa ofron shërbime në gjuhë shqipe, gjermane, angleze, italiane dhe franceze.

Albinfo.ch: Çfarë duhet të dinë klientët kur të vendosin të blejnë një apartament apo shtëpi?

Petrit Vllasi: Para së gjithash duhet të dinë të gjitha kostot që do të bëjnë, ndryshimet që do të pësojnë në përditshmërinë e re ekonomike dhe fiskale dhe aspektet kryesore të cilave duhet tu kushtojnë vëmendje kur zgjedhin pronën dhe hipotekën.

Albinfo.ch: Pse duhet të vijnë në kompaninë tuaj, dhe cilat janë kriteret e përgjithshme për të marrë një hipotekë?

Petrit Vllasi: Shumë shpesh klienti nuk ka kohë për të shkuar në disa institucione për të gjetur zgjidhjen më të përshtatshme. Këtë herë klienti më kursen pasi ne e kryejmë të gjithë procesin e përgatitjes së dokumentacionit për bankën, kontaktit dhe kërkesës për hipotekë me institucionet më tërheqëse. Dy pikat themelore që duhen plotësuar për dhënien e hipotekës janë 20% e kapitalit që duhet bërë (Eigenmittel) dhe qëndrueshmëria financiare (Tragbarkeit).

Albinfo.ch: Si ndjeheni kur arrini t’i ndihmoni bashkatdhetarët tuaj, duke krijuar strategji, të cilat do të shërbejnë në lehtësimin e jetës së tyre në aspektin financiar?

Petrit Vllasi: Kjo më bën shumë të lumtur. Sepse tregon gjithashtu se komuniteti ynë po investon shumë në pasuri të paluajtshme. Kjo është një shenjë e rritjes dhe stabilitetit ekonomik tek ne shqiptarët. Ajo që më kënaq më shumë është fakti që më në fund mund të ofroj një pikë referimi në këtë sektor të gjerë dhe kompleks për të gjithë shqiptarët në të gjithë Zvicrën.

Albinfo.ch: Shumica që marrin hipoteka e bëjnë këtë për të konsoliduar gjendjen e tyre financiare, si arrihet kjo duke shpenzuar fondin e pensioneve?

Petrit Vllasi: Paratë nga fondi pensional (2. Säule), mund te përdoren për pjesën minimale e kërkuar nga kapitali prej 20%. Megjithatë, ekziston rregulli 10% i cili shpesh është i panjohur: të paktën 10% e kapitalit duhet të jenë kursime likuide ose të shtyllës së tretë (3. Säule). Pjesa e mbetur, në varësi të situatës individuale të pensionit, mund të vijë nga fondi i pensioneve.

Albinfo.ch: Si të blejmë një shtëpi apo banesë në Zvicër, cilat janë mundësitë e financimit, kamatat e hipotekave?

Petrit Vllasi: Sot në Zvicër financim për blerjen e pasurive të paluajtshme ofrohet nga bankat, kompanitë e sigurimeve madje edhe nga fondet e pensioneve. Siç është përmendur tashmë, shuma minimale e kapitalit që duhet bërë është 20% e çmimit të blerjes.

Albinfo.ch: Hipotekat e patundshmërive lëvizin, apo edhe mund të fiksohen nga klienti?

Petrit Vllasi: Normat e interesit mund të ndryshojnë çdo ditë. Natyrisht ekziston mundësia e rregullimit të tyre në kohëzgjatje më të gjata deri në 15 vjet. Lloji i produktit për të zgjedhur varet nga qëllimi i klientit me pronën dhe nga situata e tij personale. Por mbi të gjitha edhe nga kapaciteti dhe toleranca ndaj riskut që ka klienti.

Albinfo.ch: Është paralajmëruar rritja e normave të interesit, si mendoni ju si ekspert, do të ketë edhe më shumë rritje të tyre?

Petrit Vllasi: Në planin afatgjatë, unë personalisht nuk parashikoj që normat e interesit të rriten në mënyrë dramatike. Inflacioni në Zvicër është rritur, pjesërisht edhe për shkak të rritjes së çmimeve të energjisë, por mbetet brenda kufijve të synuar të vendosur nga Banka Qendrore e Zvicrës (SNB) midis 0% dhe 2%. Prandaj, nuk është një situatë alarmante që do të sillte sinjale për ndryshime dërrmuese politiko-monetare. Megjithatë, me luftën në Ukrainë, situata në Evropë është destabilizuar deri në atë pikë sa ka lënë të hapur skenarë të paparashikueshëm.

Kush është Petrit Vllasi

Petrit Vllasi është rritur dhe shkolluar në Ticino, ndërsa është me prejardhje nga komuna e Kamenicës. Ka punuar 10 vite në UBS dhe 2 vite tek MoneyPark. Ka përfunduar shkollimin si Immobilienentwickler në Zürich. Sot është i fokusuar 100% në tregun hipotekar për shqiptarët.

043 508 03 67

[email protected]

Poststrasse 1 CH-8954 Geroldswil/ZH

https://financa.ch/

/Artikull i sponzorizuar/

Mërgimtarja shqiptare, punonjëse e suksesshme në Bankën Qendrore Evropiane

Posted on by Drin Reçica

Mërgimtarja shqiptare, Aleksandra Kolndrekaj, jeton dhe vepron në shtetin e Italisë (në Chiusa di Pesio) që nga viti 1998, transmeton albinfo.ch.

Aty përfundoi edhe shkollën fillore dhe të mesme. Më pas diplomoi në institutin Bonelli, për kontabilitet në vitin 2008.

Ky është një aktivitet në të cilin Cuneo shpërblen më të mirët ekonomikë. Edhe këtë vit, ashtu si edhe ai i mëparshmi, do të jetë një ekonomisti që do të shpërblehet me “Spilën“ që simbolizon shoqatën si “Bonelliana e Vitit 2021”.

Pas diplomimit, ajo studioi për Ekonomi dhe Tregti në Torino dhe, në të njëjtën kohë, u zgjodh për “Programin e Nderuar të Studentëve të Qendrës Kërkimore të Kolegjit Carlo Alberto” në kryeqytetin Piemontez.

Thuhet se ajo është diplomuar me nota të shkëlqyera në kursin trevjeçar, ajo vazhdoi më pas specializimin për Ekonomi, po në Torino, duke vazhduar me “Programin e Studentëve të Kolegjit Carlo Alberto”.

Pastaj iu përkushtua mësimdhënies së Makroekonomisë – si asistente – përsëri në Universitetin e Torinos. Më vonë ajo u mirëprit nga Parisi (praktikë në OECD, në departamentin e Punësimit të Punës dhe Çështjeve Sociale, ku u mor me reformat e pensioneve). Më vonë ajo u transferua në Fondacionin Evropian të Trajnimit (agjenci e Bashkimit Evropian), ku studioi politikat e tranzicionit shkollor-punë të vendeve në kufijtë e vetë Unionit.

Ndërkohë, pas shumë trajnimve dhe përvojave, ajo startoi punën në Bankën Qendrore Evropiane. Prej katër vjetësh është këtu, punon si në Departamentin e Statistikave, ashtu edhe atë të Ekonomisë, ku është përfshirë në anketa për ndërmarrjet e vogla dhe të mesme si dhe për familjet. Së fundi, në tetëmbëdhjetë muajt e fundit ajo i është përkushtuar kryesisht hetimit dhe kuptimit të pabarazive ekonomike të shkaktuara nga Covid. Përpara ceremonisë së ndarjes së çmimeve, ai do të flasë për këtë në Sala San Giovanni, në një “leccio”, ku do të shpjegojë funksionet dhe detyrat e BQE-së për studentët aktualë.

Ëndrra e realizuar e Arditës: puna në kullën e lartë 126 metra

Posted on by albinfo.ch

Me 126 metra dhe 36 kate, Prime Tower në Cyrih, është njëra ndër ndërtesat më të larta të Zvicrës. Dizajni i saj është konceptuar në atë mënyrë që rezulton një kombinim interesant i modernes dhe historisë. Të gjitha katet e sipërme, e posaqërisht Café-bari-I në katin më të lartë, ofron një pamje panoramike të Cyrihut.

Ishte viti 2014 kur Ardita Bunjaku kishte vizituar Cyrihun. Si pjesë e vizitave të saj ishte edhe Prime Tower. E mahnitur me dizajnin, si dhe pamjen që ofronte Bar-I nga lartë, asaj po ashtu i kishte rënë në sy lista e kompanive prestigjioze që zhvillojnë aktivitetin e tyre në këtë ndërtesë.

Edhe Ardita, si cçdo kush tjetër, do të ngazëllehej vetëm me idenë për të punuar në një ndërtesë të tillë, në njërën nga këto kompani.

E lindur në Prishtinë, por si fëmijë dy vjeçe emigron me familjen në Britaninë e madhe, ku dhe kalon pjesën tjetër të jetës deri në moshën 25 vjeçare.

Inovatore dhe me prirje menaxheriale

Gjatë shkollimit, tek Ardita dukej e qartë prirja e saj për numrat e llogaritjet, kështu që vendimi për të studiuar për Ekonomi Biznesi në Londër, ishte një vendim jo i vështirë për të.

“Gjatë studimeve, ishte e qartë se përvoja e punës ishte po aq e rëndësishme sa edhe përfundimi i një drejtimi akademik” thotë ajo, përderisa pas disa aplikimeve fiton vendin e saj të parë të punës në HSBC, një bankë ndërkombëtare, ku fillimisht punon si zyrtare e kredisë, ku klientët e saj ishin kompani me qarkullime të mëdha vjetore.

Aty fillojnë edhe sukseset e para. Pas vetëm 9 muajsh ajo nominohet si punëtorja më e mirë, gjë që i mundëson edhe trajnimin nga ana e saj të kolegëve të saj të punës, e që po ashtu ishte një nivel tjetër i përgjegjësisë. Po ashtu nga menaxherët e saj ajo përshkruhej edhe si shumë inovatore, natyrale e me aspirate menaxheriale.

Pasi tashmë kishte vizituar Cyrihun, e mahnitur nga ambienti i bukur që e rrethon, dhe nga stili i lartë i jetës që ofron ky qytet, Ardita, synon më lartë, duke aplikuar në kompani të ndryshme të Cyrihut për ndonjë vend pune.

Ëndrra për të punuar në Prime Tower të Cyrihut, bëhet realitet

Ndodhi që Ardita dhe Prime Tower të takohen prapë. Por kësaj radhe ajo vinte aty si analiste e tatimeve një nga bankat më të mëdha ndërkombëtare, selia e së cilës për Zvicër ishte pikërisht aty.

“Ajo që për mua dikur ishte vetëm një ëndërr, dalngadalë u kthye në realitet” shprehet Ardita, duke bërë kështu që studimet dhe përvoja e saj në Britani të shpaguhet.

Edhe këtu shpejt dallohet përkushtimi dhe zotësia e saj në punë, për çfarë emërohet si bashkë koordinatore e një ekipi prej 4 vetash. Ndërsa tash, si pjesë e një ekipi prej 12 vetash, është duke bërë specializimin në tregti dhe tatime të kompanive amerikane, gjë që padyshim do të shënojë edhe një hap tutje në karrierën e saj.

Duke punuar në një ambient multikulturor, pos punës zhvillon edhe shumë aktivitete të tjera bashkë me ekipin e saj. Por ajo ende nuk është ngopur me pamjen e Cyrihut që e sheh çdo ditë nga tavolina e punës në Prime Tower, e që e eksiton çdo ditë. Por, për të arriturat e saj të deritashme ajo padyshim se i detyrohet vetëvendosjes së saj, përkushtimit dhe punës së madhe, si dhe përvojës në të kaluarën.

Studioni! Mundimet shpaguhen një ditë

Ardita me këtë rast ka edhe një porosi për të rinjtë në Zvicër. Sipas saj, shumë nga ta nuk e shfrytëzojnë potencialin e tyre të plotë, për të përfituar nga të mirat që ky shtet mund të ofrojë. Dikujt mund t`i duket si një rrugëtim i gjatë, gjatë të cilit ndonjëherë puna dhe studimi humbin kuptimin një një pikë, por Ardita insiston se një ditë të gjitha shpaguhen…

 

Jeton Asani fitoi çmimin “British Mortgage Awards 2017”

Posted on by BR

Shqiptarët vazhdojnë të jenë të suksesshëm, duke fituar çmime të ndryshme dhe mjaft të rëndësishme. Kjo jo vetëm në sport e kulturë, por edhe në sektorë të tjerë.

I fundit që ka fituar çmim të rëndësishëm është shqiptari nga Tetova. Jeton Asani ka fituar “British Mortgage Awards 2017”, duke u shpallur më i mirë në sferën e hipotekave, ka njoftuar ‘Telegrafi Maqedoni’.

Asani është i punësuar në “Metro Bank”, i specializuar në çështje financiare, përcjell albinfo.ch.

“British Mortgage Awards” vlerëson njerëzit për arritje të larta në industrinë e hipotekave.

Goneta Jakurti

Goneta Jakurti është një vajzë 18 vjeçare e lindur në Zvicër nga prindërit shqiptarë, Jeton në Langenthal ku po ndjek mësimet në vitin e fundit të shkollës së mesme komerciale („Kaufmänische“) me maturë – drejtimi bankier.

“Gjatë këtyre viteve të punës praktike në bankën UBS më është bërë e qartë se perspektiva ime profesionale do të jetë puna në bankë. Me të përfunduar shkollën komerciale, në vjeshtë, do t’i vazhdoj studimet e larta, për t’u kthyer sërish në bankë. „Investment Banking“ është sektori i punës që më fascinon: Kërkon shumë përgjegjësi, njohuri të shumanshme (jo vetëm ekonomike por edhe politike e kulturore), njohje të gjuhëve të huaja, që është një afinitet i imi”, shprehet Goneta.

Fytyra e Goneta Jakurtit është bërë imazh i fushatës “java kundër racizmit” që u mbajt nga 21 deri më 28 mars 2012 në Bernë. Pllakatet ku duken fytyrat me gjurmë dhune të Gonetës dhe dy personave tjerë me prejardhje të huaj, pritet të sensibilizojnë zviceranët me problemin e diskriminimit racial.

“Marr pjesë vazhdimisht nëpër aktivitete kulturore, bëj moderimin në veprimtari të ndryshme, paraqitem në sfilata të modës të organizuara qoftë nga agjensionet zvicerane apo nga komuniteti shqiptar në Zvicër, Itali etj”, thotë ajo duke bërë me dije se ky angazhim nuk është krejt i rastësishëm.