Zvicra miraton regjistrin kombëtar për borxhet, synohet luftimi i abuzimeve

Sistemi i ri do të centralizojë të dhënat e përmbarimit për të parandaluar shmangien e borxheve nga zhvendosja e personave

Zvicra do të krijojë një regjistër kombëtar për përmbarimin e borxheve, pas miratimit unanim të Këshillit të Shteteve, pas vendimit të mëhershëm të Këshillit Kombëtar, përcjell albinfo.ch.

Sistemi i ri synon të centralizojë të dhënat në nivel kombëtar, me qëllim thjeshtimin e procedurave dhe parandalimin e abuzimeve, sidomos nga personat që ndryshojnë vendbanim për t’iu shmangur detyrimeve financiare.

Aktualisht, në Zvicër ekzistojnë mbi 340 zyra të përmbarimit të borxheve, ku secila mban regjistrat e saj në nivel lokal, duke bërë që informacioni të jetë i fragmentuar sipas distrikteve.

Me reformën e re, të gjitha të dhënat do të unifikohen në një sistem të vetëm kombëtar, duke rritur transparencën dhe efikasitetin në menaxhimin e borxheve. /Albinfo.ch

---