Reagon kryeministri: Deklaratat e dëshmitarit të mbrojtur, spektakël medial

Intervista “bombë” e Shkumbin Mehmetit ka ngjallur debate dhe reagime gjithandej opinionit kosovar, madje ka shtyrë edhe kryeministri Ramush Haradinaj të reagoj. Ky i fundit e quan spektakël medial

Një intervistë që është emetuar të enjten mbrëma nga burgu i sigurisë së lartë, një i vetëshpallur “kriminel i pasluftës”, ka akuzuar disa persona të tjerë për vrasjet politike, madje  ka përmendur edhe emrat dhe nxitësit e këtyre krimeve. Kjo intervistë “bombë” ka ngjallur debate dhe reagime gjithandej opinionit kosovar, madje ka shtyrë edhe kryeministri Ramush Haradinaj të reagojë.

Haradinaj sot është pyetur për deklaratat e dëshmitarit të Prokurorisë Speciale, Shkumbin Mehmeti, i cili ka akuzuar për vrasjet e pasluftës  shumë persona nga rajoni i Dukagjinit nga vjen kryeministri. Haradinaj tha se është habitur me këtë mënyrë të komunikimit ndonëse siç tha nuk e ka parë intervistën.

“Jam habitur me këtë mënyrë të komunikimit, një person nga burgu me dhënë intervistë, diçka është e çuditshme dhe në sistemin e drejtësisë nuk lejohet kjo. U tha se ai ka pasur një leje prej gjykatësve, mirëpo të gjithë ato deklarata ishte dashur me qenë materie për prokurorë dhe gjyqtarë. Sidomos nëse ato ekzistojnë mbi dhjetë vite aq sa, pra ishte dashtë ato me dhënë rezultate dhe jo me u bërë spektakël medial. Imagjinoni sa është i përgjegjshëm kur flet dhe zakonisht këto filtrohen dhe janë materie vetëm e instancave ligjore. Pra, jam habitur, por unë se kam parë intervistën, por pash shumë reagime të asaj që u thanë. Jam habitur!”, tha Haradinaj.

Ndryshe, në një rrëfim ekskluziv që është emetuar parmbrëmë nga televizioni KKosova, Kushtrim Mehmeti, dëshmitar i mbrojtur i Prokurorisë Speciale të Kosovës, ka drejtuar akuza të shumta për vrasjet e cilësuara si politike, që kanë ndodhur pas luftës në Kosovë.

Ai këto akuza i ka bërë si një person i dënuar me 30 vjet burg për vrasjen e policëve të UNIMIK-ut dhe si njëri ndër pjesëtarët e grupit të vrasësve, të cilit ai thotë se i kanë prirë vëllezërit Ibrahim dhe Qerim Kelmendi.

Konkretisht Mehmeti ka thënë se Ibrahim e Qerim Kelmendi janë përgjegjës për vrasjen e deputetit të LDK-së, Smail Hajdaraj dhe të oficerit të FARK-ut, Tahir Zemaj. Mehmeti ka thënë më tutje se vëllezërit Kelmendi kanë ngarkuar Florim Ejupin me detyrë për vrasjen e Xhavit Halitit, deputet i PDK-së, por se plani për vrasjen e tij ka dështuar.

Ndërsa, sipas tij, veprimtarin e LDK-së, Xhemail Mustafa e ka vrarë Agron Sylejmani.