245 të vdekur nga zjarri në diskotekë

Numri më i madh i të vdekurve është shkaktuar nga paniku që i ka kapluar të pranishmit në diskotekë, pas shpërthimit të zjarrit

Në një diskotekë në qytetin  Santa Maria, në jug të Brazilit ka shpërthyer në natën e të shtunës një zjarr i madh, që sipas të dhënave të policisë ka pasur për pasojë vdekjen e së paku 200 personave. Një zëdhënës ka folur madje për më shumë se 245 viktima.

Numri më i madh i të vdekurve është shkaktuar nga paniku që i ka kapluar të pranishmit në diskotekë, pas shpërthimit të zjarrit. Ata kanë shkelur njëri tjetrin duke u përpjekur të iknin nga kaosi.

Një bend po bënte muzikë në momentin kur shpërtheu zjarri në lokalin e përmendur. Sipas dëshmitarëve të tragjedisë së rëndë, shkaktarë të zjarrit kishin qenë fishekzjarrët që ishin pjesë e programit argëtues të mbrëmjes. 

Presidentja e vendit, Dilma Rousseff ka ndërprerë vizitën e saj zyrtare në Çile për shkak të katastrofës dhe është kthyer në Brazil.