Bateritë mund të mbushen plotësisht për pak minuta me teknologjinë e re të Samsungut

Instituti i Avancuar për Teknologji i Samsungut (SAIT) ka njoftuar se e ka zhvilluar një teknologji të re të baterive të cilat mund të mbushen shumë më shpejtë te telefonat mobilë dhe te veturat elektrike.

Për një bateri aktualisht duhet një orë mbushje me teknologjinë për mbushje të shpejtë, por Samsungu thotë se me teknologjinë që do ta sjellë do ta mbushë një bateri për 12 minuta.

Teknologjia e re përbëhet nga atomet e karbonit nga grafiti, që është 100 për qind më efikase se bakri në përcjelljen e elektricitetit. Ajo transferon energjinë “140 herë më shpejtë se bateritë me litium”, ka thënë Samsungu.

Koncepti sipas Samsungut do të ketë çmim shumë të përshtatshëm, por nuk është bërë e ditur se kur do të lansohet kjo teknologji e re për telefonat dhe veturat.