Skuadra angleze e kërkon Rashicën

Mediat britanike raportojnë se klubi anglez i Newcastle United është duke u interesuar për shërbimet e futbollistit shqiptar, Milot Rashica.

21-vjeçari nga Vushtrria nga viti 2016 është edhe pjesë e përfaqësueses së Kosovës, ndërkohë në vitin 2015 u transferua nga skuadra e Llamkos Kosova në kampionatin holandez te Vitesse, shkruan albinfo.ch.

Plot pesë milionë euro pritet të derdhë klubi anglez në arkat e Vitesses për transferimin e Rashicës.

Edhe në të kaluarën shumë skuadra janë interesuar për futbollistin nga Vushtrria, i cili është njëri nga lojtarët kyç në skuadrën e tij holandeze.

Napoli në Itali ka qenë një nga skuadrat e interesuara për yllin e Kosovës.