Takimi Destani-Majko, bisedohet për potencialet turistike të Shqipërisë

Gjatë takimit miqësor u diskutua për potencialet turistike të Shqipërisë, me theks të veçantë tek iniciativat që do të ndihmojnë për tërheqjen e investimeve të huaja

Ministri i Diasporës për Shqipërinë, Pandeli Majko me ftesë të sipërmarrësit të suksesshëm shqiptar Lazim Destani, vizitoi zyrat e tij në qendër te Dyseldorfit.

Destani dhe familja e tij, me origjinë nga Malësia e Sharrit në Tetovë, drejtojnë një rrjet ndërkombëtar biznesesh që veprojnë në sektorin e shërbimeve, inxhinierisë së ndërtimit energjetikës dhe logjistikës, përcjell albinfo.ch.

Siç i tha ministrit një përfaqësues i rrjetit, ata janë të pranishëm në mbi 30 vende, me kompani e projekte, njofton ministria.

Gjatë takimit miqësor u diskutua për potencialet turistike të Shqipërisë, me theks të veçantë tek iniciativat që do të ndihmojnë për tërheqjen e investimeve të huaja.

Majko u njoh me aktivitetet dhe projektet e rrjetit ndërkombëtar, e gjithashtu të kompanisë “Ecolog-International” e cila prej vitesh është kontraktori kryesor në mega projekte për shërbime teknike, logjistike, infrastrukture etj. Ndërsa vlerësoi arritjet e familjes Destani, si një shembull të integrimit të suksesshëm në vendet pritëse, ministri e falënderoi atë për kontributin e dhënë për kauza të ndryshme shqiptare.