Haradinaj e Rama kërkojnë ndihmë nga BE-ja

Në Konferencën e tretë të Investimeve për Ballkanin Perëndimor në Londër, kryeministri Ramush Haradinaj ka prezantuar projektet e Kosovës, të cilat kanë të bëjnë kryesisht me infrastrukturë. Ai ka thënë se Kosova është në fazën e fundit të ndërtimit të autostradave.

“Për Kosovën është me rëndësi të përfundohet infrastruktura. Autostradat janë gati në përfundim dhe ato na lidhin me vendet e rajonit. Jemi në dinamikë të mirë për të përfunduar autostradat në Serbi – Autostradën e Paqes, ashtu siç tha edhe kryeministrja e Serbisë, dhe atë për në Maqedoni”, ka thënë Haradinaj, përcjell albinfo.ch.

Më tej ka thënë se në Kosovë kanë krijuar kushte për ndërmarrësit e rinj, ku ka theksuar se ka kompani të IT-së, të cilat janë të bashkuara me rajonin dhe botën.

Ndërsa kryeministri i Shqipërisë, Edi Rama ka kërkuar që BE të jetë më bujare sa i takon Shqipërisë dhe Maqedonisë. “Pra, apeli im për miqtë tanë të dashur, Komision dhe BE, është se nëse nuk keni më shumë para për ne, kjo është OK, bëhuni më bujarë me gjërat që nuk ju kushtojnë. Kjo është e rëndësishme për një Evropë më të konsoliduar”, ka thënë Rama.