LDK: Kjo qeveri duhet të shkojë në shtëpi

Në kohën kur partitë në pushtet kanë mbetur me vetëm 52 vota në Kuvend, Lidhja Demokratike e Kosovës insiston se vendi duhet të shkojë në zgjedhje të parakohshme

Dëbimi i shtetasve turq, dalja e Listës Serbe nga Qeveria dhe mbetja në Kuvend e koalicionit me vetëm 52 vota janë arsye të mjaftueshme që kjo qeveri të shkojë në shtëpi.

Kështu ka thënë shefi i grupit parlamentar të LDK-së, Avdullah Hot,i në konferencën e përjavshme të këtij subjekti politik, raporton KTV .

Në kohën kur partitë në pushtet kanë mbetur me vetëm 52 vota në Kuvend, Lidhja Demokratike e Kosovës insiston se vendi duhet të shkojë në zgjedhje të parakohshme, përcjell albinfo.ch.

E në rast se një gjë e tillë nuk ndodh, atëherë kjo parti planifikon të organizojë mocion për rrëzimin e qeverisë Haradinaj.

Shefi i grupit parlamentar të kësaj partie, Avdullah Hoti, në konferencën javore ka thënë se Kosova nuk guxon të udhëhiqet me këta njerëz që aktualisht janë në pushtet.

Megjithatë, sipas Hotit, e rëndësishme është që zgjedhjet të mos mbahen brenda 30 ditëve, por të përgatiten më mirë.

Kjo parti ka bërë të ditur se është në bisedime me partitë e tjera opozitare për rrëzimin e kësaj qeverie, që sipas saj, përveç se dëm nuk i ka sjellë asgjë të mirë vendit.

Hoti ka folur edhe për rezolutën e miratuar në Kuvend, derisa ka thënë se qeveria e Haradinajt ka dështuar me dëbimin e gjashtë shtetasve turq.