Deklarohen LVV dhe LDK: Nesër, takim me ambasadorët e QUINT-it

Pas takimit të sotëm të krerëve të Lëvizjes Vetëvendosje dhe Lidhjes Demokratike të Kosovës për arritjen e marrëveshjes për bashkëqeverisje, e që rezultoi i pasuksesshëm, LVV dhe LDK kanë dalë me komunikata zyrtare për media.

Në deklaratën e Lëvizjes Vetëvendosje thuhet se në takimin e sotëm nuk është arritur marrëveshja.

LVV thotë se edhe nesër dy subjektet politike do të zhvillojnë një takim me ambasadorët e vendeve të QUINT-it.

“Sot pasdite, në Kuvendin e Kosovës u mbajt edhe një takim ndërmjet LVV dhe LDK. Nuk u arrit marrëveshja”.

“Palët u pajtuan që nesër të zhvillohet një takim tjetër bashkë edhe me ambasadorët e Quint-it në Prishtinë si dhe me Shefen e Misionit të BE-së”, thuhet në deklaratën e LVV-së.

Ndërsa, LDK thotë se në takim kanë shpalosur qëndrimet e tyre tashmë të njohura për opinionin.

“Në takimin e sotëm kemi shpalosur qëndrimet tona, tashmë të njohura dhe publike për opinionin. Konsiderojmë që këto qëndrime janë të balancuara për të dy palët dhe që i shërbejnë stabilitetit të qeverisjes së vendit”, thuhet në deklaratën e LDK-së.

LVV përkujton se kanë mbetur edhe tetë ditë deri në skadimin e afatit kushtetues për koalicionin qeverisës, përcjell Albinfo.ch.