Ambasada e Kosovës në Austri nderon Orkestrën “Amadeus” për suksesin në Festivalin Botëror të Orkestrave në Vjenë

Në një atmosferë të ngrohtë dhe miqësore, Ambasada e Republikës së Kosovës në Austri priti Orkestrën “Amadeus” në shenjë mirënjohjeje dhe falënderimi për pjesëmarrjen dhe çmimin e fituar në Festivalin Botëror të Orkestrave, mbajtur në Vjenë.

Udhëheqësi i misionit diplomatik, Albinot Bimbashi, takoi anëtarët dhe stafin e orkestrës duke i vlerësuar me fjalë të ngrohta dhe lavdërime për suksesin e arritur, duke theksuar kontributin e tyre në promovimin e kulturës dhe talentit të rinisë kosovare në arenën ndërkombëtare.

Anëtarët e orkestrës shprehën mirënjohje të thellë për mikpritjen dhe mbështetjen e Ambasadës së Kosovës, si dhe falënderuan Qeverinë e Republikës së Kosovës për mbështetjen e dhënë, që mundësoi pjesëmarrjen në këtë festival të rëndësishëm në qendrën botërore të muzikës klasike, transmeton albinfo.ch.

Ky takim u cilësua si një moment i veçantë motivues për të vazhduar rrugëtimin artistik me përkushtim dhe pasion në shërbim të artit dhe vendit të tyre.