Tarifat amerikane godasin projektin 500 milionësh, Corden Pharma tërhiqet nga Muttenz

Keystone EPA/KENT NISHIMURA / POOL

Kompania farmaceutike amerikane Corden Pharma ka anuluar projektin e saj të madh në zonën Schweizerhalle në Muttenz të Zvicrës, i cili parashihte investime mbi 500 milionë euro dhe krijimin e më shumë se 300 vendeve të punës.

Sipas kompanisë, vendimi është marrë pas një rishikimi strategjik të planeve të saj të investimeve. Si faktor i mundshëm ndikues përmenden edhe tarifat e reja doganore të SHBA-së ndaj produkteve farmaceutike.

Projekti, i prezantuar një vit më parë, parashihte ndërtimin e një fabrike të re për prodhimin e peptideve, substanca që përdoren ndër të tjera në barnat për humbje peshe. Ndërtimi pritej të fillonte në vitin 2025, ndërsa prodhimi në 2028.

Autoritetet e komunës së Muttenz kanë shprehur zhgënjim për vendimin, duke theksuar se projekti do të sillte zhvillim ekonomik dhe vende të reja pune për rajonin.

Pavarësisht anulimit të këtij projekti, Corden Pharma deklaron se mbetet e përkushtuar ndaj zgjerimit të saj global dhe investimeve në Evropë dhe Zvicër në të ardhmen.