Vështirësohet tërheqja paraprake e pensionit

Arsyeja është se personat që para moshës së pensionimit marrin shumën e përmendur, kur pensionohen pastaj ndodh të kërkojnë ndihma kompensuese

Paratë e sigurimit pensional në të ardhmen nuk mund të tërhiqen paraprakisht ashtu lehtë dhe pa komplikime siç bëhet sot. Siç dihet, njerëzit që kanë në askat e tyre pensionale para të akumuluara nga puna e tyre,mund të presin moshën e pensionit për të marrë pensionin në baza mujore por mund edhe të tërheqin paraprakisht tërë shumën e akumuluar.

Këtë mund ta bëjnë në rast se e lëshojnë vendin dhe në rastet kur e dëshmojnë se duan të nisin ndonjë investim, si fjala vjen ndërtim të shtëpisë ose ngritje të ndonjë firme.

Por Këshilli Federal ka vendosur të mërkurën që kjo gjë të pengohet. Arsyeja është se personat që para moshës së pensionimit marrin shumën e përmendur, kur pensionohen pastaj ndodh të kërkojnë ndihma kompensuese (ErgänzungsLeistungen).

Duke ndryshuar këtë praktikë, qeveria ka menduar në radhë të parë për personat që kanë marrë fondin e akumuluar të pensionit për t`u pavarësuar, gjegjësisht për të ngritur firma. Kjo për faktin se në rast falimentimi të firmës, paratë humben dhe personat në fjalë bëhen sërish të varur nga ndihmat kompensuese të shtetit.

Po ashtu Këshilli Federal planifikon që të kontrollojë në mënyrë më të detajuar se sa kapital të vetin posedon personi që kërkon të tërheq paraprakisht fondin e pensionit të tij.