Abdixhiku: Kurti, fajtor për sanksionet, duhet rrugë e re pa të

Foto nga Lumir Abdixhiku në Facebook

Kryetari i Lidhjes Demokratike të Kosovës, Lumir Abdixhiku, ka akuzuar kryeministrin e Kosovës, Albin Kurti, për sanksionet e Bashkimit Evropian ndaj Kosovës.

“Pezullim i fondeve të BE-së; Pezullim i MSA-së, Pezullim i takimeve të nivelit të lartë, Pezullim i vizitave bilaterale. Sanksione Kosovës, avancim për Serbinë. Si qenka kjo fitore për ne? Teksa ne përjashtohemi nga programet ushtarake me NATO-n; Serbia vazhdon misionet paqeruajtëse me ta. Teksa ne humbasim nga programi 7.5 miliardësh për zhvillim dixhital, shtetet e rajonit ecin me hapa të mëdhenj. Kam takuar në vazhdimësi biznese nga komuniteti i IT-së, punëdhënës të jashtëzakonshëm, me potencial dhe më të madh. Sot, humbasin ata dhe të rinjtë që do të punësonin në vazhdimësi”, ka shkruar Abdixhiku, përcjell albinfo.ch.

Tutje, kreu i LDK-së thotë që Kosova nuk ka qenë kurrë më keq ndërkombëtarisht dhe se Serbia ka shumë përkrahje.

Abdixhiku ditë më parë bëri thirrje për rrugë të re, duke paralajmëruar takime me akterë të shoqërisë për të ndërtuar “rrugën e vërtetë, pa Kurtin”.