Tre shqiptarë gjykohen për 500 kilogramë kokainë të fshehur në thasë të kafes

Prokuroria Bazel-Landschaft ka identifikuar tre shtetas shqiptarë lidhur me transportimin e kokainës me vlerë prej 60 milionë frangash. Gjykimi fillon më 21 janar

Në Romont, Kantoni i Friburgut, punonjësit e fabrikës së Nespresso-s kishin zbuluar gjysmë ton kokainë në një konteiner kafeje. Tre shqiptarë do të dalin në gjyq para Gjykatës Penale të Basel-Landschaft duke filluar nga 21 janari, tranmseton albinfo.ch.

Të pandehurit ishin ende duke kërkuar kontejnerin në Frenkendorf kur ai ishte tashmë në rrugë për për në Romont.

Në pranverën e vitit 2022, policia pati sekuestruar gjysmë ton kokainë në fabrikën e Nespressos në Romont, në kantonin e Fribourgut. Sasia e kapur ishte “vetëm” rasti i dytë më i madh i kontrabandës së drogës i zbuluar ndonjëherë në Zvicër por vlera e drogës ishte rekorde: Rreth 60 milionë franga zvicerane ishte vlera e saj nëse do të shitej në rrugë, sipas Zyrës së Prokurorisë Publike të Basel-Landschaft në aktakuzën e saj, e cila tani është para Gjykatës Penale, shkruan baslerzeitung.ch.

Kokaina kishte një nivel mesatar pastërtie prej 99 për qind.

Duke filluar nga 21 janari i këtij viti, tre persona do të dalin në gjyq para Gjykatës Penale Basel-Landschaft për shkelje të rënda të Aktit të Narkotikëve. Procedurat kundër të treve po zhvillohen në Basel-Landschaft sepse fokusi kryesor i aktivitetit kriminal u zhvillua në Frenkendorf të këtij kantoni. Kontejneri i transportit u ruajt përkohësisht në ambientet e Swissterminal AG atje për afërsisht 32 orë në prill 2022. Të pandehurit ishin përpjekur atje vazhdimisht të vidhnin kokainën.

Itinerari: Santos – Antwerp – Frenkendorf – Romont

Kontejneri ku ishte vendosur droga ishte i ngarkuar kryesisht me kokrra kafeje në thasë jute dhe qe larguar nga terminali i eksportit në qytetin portual brazilian Santos, në mesin e marsit të vitit 2022, përcjell albinfo.ch. Pak më shumë se tre javë më vonë, anija e mallrave arriti në portin e Antwerpit, ku kontejneri u ruajt përkohësisht për gati dy javë përpara se të transportohej me tren në  Swissterminal AG në Frenkendorf.

Me mbërritjen e tij, kontejneri u vendpos sipër dy kontejnerëve të tjerë në depo. Vonë mbrëmjen tjetër, ngarkesa e kafesë u nis përsëri nga rajoni i Bazelit, duke u drejtuar drejt Romontit, ku kontejneri u hap pas dy ditësh të tjera magazinimi.

Më 2 maj, rreth orës 20 të mbrëmjes, punonjësit e Nespresso-s zbuluan qeset me kokainë, të shënuara me kryqe blu, ndërsa shkarkonin kontejnerin dhe njoftuan policinë. Përafërsisht 20 nga 320 thsët prej jute përmbanin nga 25 kilogramë kokainë secila, të paketuara në blloqe, përveç kafesë së papërpunuar.

Policia supozon se ishte një operacion i dështuar “mashtrimi”. Në këtë metodë, ngarkesa e paligjshme ngarkohet pa dijeninë e pronarit të ligjshëm të mallrave dhe synon të hiqet fshehurazi në një pikë të ndërmjetme të udhëtimit.

Tre shqiptarë të dyshuar

Pas zbulimit, zyra e prokurorit publik të kantonit të Fribourgut nisi një hetim, por e mbylli atë pas gjashtë muajsh për shkak të mungesës së të dyshuarve.

Kërkimi nga zyra e prokurorit publik të Bazel-Landschaft ishte më i suksesshëm. Ajo ka identifikuar tre shtetas shqiptarë – tani të moshës 31, 32 dhe 34 vjeç – të cilët dyshohet se dinin për ngarkesën e paligjshme dhe, sipas aktakuzës, kishin ndërmend ta merrnin dhe transportonin atë nga Frenkendorf.

Sipas aktakuzës, dy nga tre të pandehurit udhëtuan nga Italia veriore, ndërsa i treti së fundmi banonte në kantonin e Aargaut, ku punonte edhe si shofer. Atij dhe kolegut të tij dyshohet se u ishin premtuan një pagesë prej 700,000 frangash zvicerane nëse do të arrinin të merrnin dhe transportonin kokainën.

Të tre të pandehurit aktualisht janë në paraburgim në Muttenz ose Bazel. Ata konsiderohen të pafajshëm derisa të provohet fajësia. Procedura të veçanta janë duke u zhvilluar kundër anëtarëve të tjerë të dyshuar të bandës që dyshohet se kanë marrë pjesë në përpjekjet e marrjes së kokainës.

Kështu u vunë në dijeni hetuesit për bandën.

Siç raporton portali online Swissinfo.ch, agjencia kantonale e zbatimit të ligjit Basel-Landschaft kishte shqyrtuar pamjet video  nga Swissterminali. Videot e mbikëqyrjes u treguan hetuesve se të paktën katër persona kishin qenë vazhdimisht në zonën e terminalit gjatë, para dhe pas magazinimit të përkohshëm në Frenkendorf, duke inspektuar zonën, duke kërkuar kontejnerin me një elektrik dore dhe duke vepruar si vrojtues.

U identifikua gjithashtu një makinë e dyshimtë me qira, e cila kishte kaluar nëpër zonën logjistike disa herë ato ditë. Për më tepër, hetuesit analizuan telefonat celularë të të dyshuarve, trnsmeton albinfo.ch. Për të siguruar komunikimin gjatë fazës kritike të operacionit, grupi kishte marrë posaçërisht kartat SIM zvicerane.

Kryetari i dyshuar i grupit u kap dhe u arrestua edhe gjatë një përpjekjeje për marrjen e kontejnerëve, pasi punonjësit e Swissterminalit raportuan ndërhyrësit në polici. Megjithatë, për shkak se objektivi i tij i vërtetë ishte i panjohur në atë kohë, ai u lirua shpejt.

Pasi u lirua me kusht, i përmenduri u kthye në Itali. Më vonë u arrestua në Brescia – këtë herë me dyshime konkrete – dhe, sipas Swissinfo.ch, u ekstradua në Zvicër.

Zyra e prokurorit kantonal të Basel-Landschaft hetoi gjithashtu akomodimin dhe strehimin e bandës, të cilën i akuzuari, i cili banon në Zvicër, e kishte organizuar për disa ditë. Ishte një bordello në Jura të Bernës. Anëtarët e bandës hynin në Zvicër veçmas ose udhëtonin me automjete të ndryshme gjatë ditës, duke u takuar përsëri në “bazën” e tyre në mbrëmje për të diskutuar hapat e tyre të mëtejshëm.

Ku po shkonte droga?

Të akuzuarit ishin në dijeni të kohës kur kontejneri që po kërkonin u shkarkua në Frenkendorf. Megjithatë, ata e humbën udhëtimin e tij të mëtejshëm për në Romont, kështu që një nga operacionet e tyre të rikuperimit u zhvillua kur kontejneri ishte tashmë në tren për në Romont.

Nëse do ta kishin gjetur drogën më herët, ndoshta nuk do të kishin mbetur në Zvicër, përcjell albinfo.ch. Zyra e prokurorit publik të Basel-Landschaft supozon se droga do të ishte kontrabanduar jashtë vendit. Pastërtia e lartë e kokainës sugjeron gjithashtu se Zvicra ishte zgjedhur që të shërbente vetëm si pikë tranziti në këtë rast.

---