Alban Meha, më i miri në bundesligën 2

Si lojtar i sezonit është kurorëzuar Alban Meha nga SC Paderborn. AI ka fituar 53 për qind të votave të të gjithë lexuesve që kanë votuar

Javën e kaluar është përmbyllur sezoni 2013-2014 i Bundesligës së Dytë gjermane. Dy ekipe, FC Köln dhe SC Paderborn do të kalojnë në Bundesligën 1, ndërsa Arminia Bielefeld, Dynamo Dresden dhe Energie Cottbus do të detyrohen të zbresin në Ligën e Tretë.

Lexuesit e portalit të bundesligës së dytë liga2-online gjatë një jave kanë pasur mundësinë të votojnë për futbollistin e tyre të preferuar për këtë sezon. Dhe, në fund, si lojtar i sezonit është kurorëzuar Alban Meha nga SC Paderborn. Futbollisti i kombëtares shqiptare ka fituar 53 për qind të votave të të gjithë lexuesve që kanë votuar.

Është interesante se futbollisti shqiptar që ka mbushur 28 vjet, si pasojë e një lëndimi të meniskusit, në ndeshjet kampionale është inkuadruar vetëm në javën e shtatë.

Por, në 25 ndeshjet në të cilat ka luajtur, Meha ka arritur të dëshmojë vlerën enorme që ai ka për klubin e tij, shkruan  liga2-online. Me 12 golat e shënuar dhe me tri asistimet, atij i takon një pjesë e madhe e meritës për forcën e treguar ofensive të klubit të tij SCP (i cili tashmë ka kaluar në bundesligën 1) gjatë muajve të fundit.