Anulohet ndeshja Zvicër-Ukrainë

Sipas Federatës së Futbollit Zviceran, mjeku kantonal, Roger Harstall ka urdhëruar që Ukrainasit të futeshin në karantinë

Pak minuta më parë Uefa ka njoftuar se loja në mes të Zvicrës dhe Ukrainës nuk mund të zhvillohet të martën (sonte) siç është planifikuar. Uefa do të vendosë në orët e ardhshme nëse ndeshja në Lucern mund të zhvillohet në një kohë tjetër – ndoshta të mërkurën, shkruajnë mediat zvicerane.

Sipas Federatës së Futbollit Zviceran, mjeku kantonal, Roger Harstall ka urdhëruar që ukrainasit të futeshin në karantinë, transmeton albinfo.ch. “Urdhri i karantinës ëështë menduar po ashtu edhe për të mbrojtur kundërshtarin” shpjegon mjeku masën që ka marrë.

Nëse loja anulohet tërësisht nga Uefa, komiteti disiplinor i Federatës Evropiane do të duhet të marrë një vendim. Një vendim i qartë do të ishte humbja 3-0 për Ukrainën.

Në këtë rast, ekipi kombëtar i Zvicrës do të kishte siguruar qëndrimin në klasën më të lartë A të Ligës së Kombeve. Evropianët Lindorë (ukrainasit) kanë 3 pikë më shumë se Zvicra para ndeshjes së fundit në fazën e grupeve.

---