As mjegulla nuk ndal fluturimet në Prishtinë

Menaxheri i planifikimit të fluturimeve në Aeroportin Ndërkombëtar “Adem Jashari” në Prishtinë, Driton Hyseni, ka thënë se pavarësisht mjegullës, fluturimet janë realizuar me sukses.

Hyseni ka treguar se deri rreth orës 9:00 janë realizuar operimet e para, 4 shkuarje e dy arritje.

“Përkundër mjegullës së dendur rreth e rrotull Prishtinës këndej në aeroport, sot jemi me shumë fat, shpresojmë të jemi edhe në ditët në vazhdim! Dukshmëria është në nivelet që mundëson arritje e shkuarje të aeroplanëve në/nga aeroporti sipas planifikimeve tona. Dje shërbyem 5,000 udhëtarë, sot, nesër e pasnesër presim edhe rreth 30,000 udhëtarë në mbi 230 vajtje/ardhje të aeroplanëve”, ka shkruar Hyseni në rrjetet sociale, përcjell albinfo.ch.

Ditë më parë në Aeroportin e Prishtinës ka ‘arritur’ edhe pasagjeri i 2-miliontë, derisa drejtuesit besojnë se brenda vitit numri i udhëtarëve do të shkojë në 2.2 milionë, rekord deri më tani.