Austria e vazhdon dhe e rrit misionin e saj ushtarak në Kosovë

Aktualisht Austria ka të stacionuar në Kosovë 379 ushtarë. Si përplotësim mund të angazhohen edhe 230 pjesëtarë të trupave operative rezervë

Këshilli i Ministrave i Austrisë të martën që vjen do të vendosë për vazhdimin deri në fund të vitit 2014 të misioneve të jashtme ushtarake të vendit. Në këtë pako hyn edhe shtimi i numrit të trupave të kontingjentit austriak në kuadër të KFOR-it në Kosovë. Kështu, nga maksimalisht 450 sa ka qenë kufiri më i lartë i lejuar deri më tash, misioni austriak në Kosovë do të ketë 600 ushtarë, njofton Agjencia Austriake e Lajmeve APA, duke iu referuar Ministrisë së Mbrojtjes. 

Si bazë për shtimin e trupave në Kosovë, ministria ka paraqitur nevojën për të pasur një hapësirë më të madhe për bërë në mënyrë më fleksibile rotacionin e forcave ushtarake atje. Ndërsa tërheqja nga Golani, nuk ka të bëjë drejtpërdrejtë me këtë shtim të pranisë në Kosovë, ka sqaruar ministria e mbrojtjes e Austrisë. 

Aktualisht Austria ka të stacionuar në Kosovë 379 ushtarë. Si përplotësim mund të angazhohen edhe 230 pjesëtarë të trupave operative rezervë (Batalioni i ashtuquajtur ORF-Bataillon).

Është vazhduar edhe për një vit po ashtu edhe misioni austriak në Bosnjë e Hercegovinë ku mund të angazhohen deri në 400 ushtarë. Po kështu, sikurse në Kosovë, ashtu dhe në Bosnjë është paraparë një përforcim i përkohshëm prej më së shumti 250 ushtarësh.