Austria forcon ligjet për armët dhe sigurinë në shkolla pas tragjedisë në Graz

Keystone EPA/ANTONIO BAT

Pas sulmit të përgjakshëm në një shkollë të mesme në Graz ku humbën jetën dhjetë persona, qeveria austriake ka njoftuar masa të reja për të forcuar ligjet për armëmbajtjen dhe për të rritur sigurinë në shkolla.

Kancelari Christian Stocker (ÖVP) deklaroi para Këshillit Kombëtar se do të prezantohet këtë javë një paketë masash që përfshin rregulla më të ashpra për armët, mbështetje për viktimat dhe përmirësim të sigurisë shkollore. Këto masa do të miratohen në mbledhjen e Këshillit të Ministrave të mërkurën, transmeton albinfo.ch.

Sulmi ndodhi më 11 qershor, kur një ish-nxënës 21-vjeçar hyri në shkollë i armatosur me një pistoletë Glock dhe një pushkë të shkurtuar, duke vrarë nëntë nxënës dhe një mësues, si dhe duke plagosur 11 të tjerë, para se të vriste veten. Të dyja armët i kishte blerë legalisht në muajt prill dhe maj të këtij viti, pavarësisht se ishte refuzuar më parë për shërbimin ushtarak për arsye psikologjike.

Masat e reja përfshijnë:

Kontrolle më të rrepta për pajisjen me leje armësh

Bashkëpunim më të mirë ndërmjet autoriteteve civile dhe ushtarake

Fond kompensimi për familjet e viktimave (përfshirë mbulimin e shpenzimeve të varrimit dhe mbështetje psikologjike)

Rritje të shërbimeve të psikologjisë shkollore

Rregullore të reja për përdorimin e rrjeteve sociale nga të rinjtë

Siguri shtesë në shkolla dhe praninë e policisë deri në fund të vitit shkollor

Mbikëqyrje për nxënësit që braktisin shkollën